យានយន្ដគ្រប់ប្រភេទជាង ៧០០គ្រឿងត្រូវបានឃាត់ត្រួតពិនិត្យណែនាំអោយរុះរើចេញ និងធ្វើកិច្ចសន្យាបញ្ឈប់ការដឹកទំនិញសំពីងសំពោងបន្តទៀត ដោយអនុវត្តតាមបទបញ្ជាយ៉ាងម៉ឹងម៉ាត់របស់ឯកឧត្ដម វ៉ី សំណាង អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ដតាកែវ ក្នុងអង្គប្រជុំកាលស្ដីពីការទប់ស្កាត់ និងលុបបំបាត់រថយន្ដដឹកទំនិញសំពីងសំពោងអោយអស់នៅក្នុងភូមិសាស្ត្រខេត្ដតាកែវ។

លោកឧត្ដមសេនីយ៍ទោ ម៉ែន លី ស្នងការនគរបាលខេត្ដ បានចេញបញ្ជាឱ្យនគរបាលក្រុង-ស្រុកទាំង១០ និងផែននគរបាលសណ្ដាប់ធ្នាប់ ចុះអនុវត្តរឹតបន្ដឹងច្បាប់ស្ដីពីចរាចរណ៍ផ្លូវគោក ចំពោះរថយន្តដឹកសំពីងសំពោង គិតចាប់ពីថ្ងៃទី២៨ ខែឧសភា ដល់ថ្ងៃទី១៤ ខែមិថុនា ឆ្នាំ២០២៥ បានធ្វើការត្រួតពិនិត្យឃាត់យានយន្តបានចំនួន ៦៨១គ្រឿង។

ក្នុងនោះរថយន្តធុនស្រាលចំនួន ៣៨៣គ្រឿង រុះរើ ២៤៥គ្រឿង កិច្ចសន្យា ១៣៨គ្រឿង រថយន្តធុនធ្ងន់ចំនួន ២៩៨គ្រឿង រុះរើ ១៥០គ្រឿង កិច្ចសន្យា ១៤៨គ្រឿង និងយានផ្សេងៗចំនួន ២៨គ្រឿង រ៉ឺម៉កម៉ូតូ ២៥គ្រឿង រុះរើ ២២គ្រឿង កិច្ចសន្យា ០៣គ្រឿង គោយន្តកន្ត្រៃ ០៣គ្រឿង រុះរើ ០១គ្រឿង កិច្ចសន្យា ០២គ្រឿង ផងដែរ៕