ក្រោមកិច្ចសហការជាមួយសមភាគីចិន វិស័យកីឡាប្រដាល់គុនខ្មែរ កម្ពុជាគ្រោងនឹងវិវត្តឈានដល់ការបើកវិទ្យាស្ថានបណ្ដុះបណ្ដាលគុនខ្មែរ ដែលមានគ្រូបង្វឹកមានបច្ចេកទេសខ្ពស់ រួមជាមួយសម្ភារហ្វឹកហាត់ស្ដង់ដារ។ 

ប្រធានសហព័ន្ធកីឡាប្រដាល់គុនខ្មែរ លោក ខូវ ឆាយ បានគូសបញ្ជាក់ថា ការបង្កើតជាផ្លូវការ នៃវិទ្យាស្ថានបណ្ដុះបណ្ដាលគុនខ្មែរ គឺជាការបោះជំហានដ៏ធំមួយរបស់គុនខ្មែរ ក្នុងការផ្សព្វផ្សាយ និងអភិវឌ្ឍន៍ទៅកាន់ឆាកអន្តរជាតិ តាមរយៈការបណ្ដុះបណ្ដាល ធនធានមូលដ្ឋានគ្រឹះទៅគ្រូបង្វឹក មន្ត្រីបច្ចេកទេសគុនខ្មែរ ឱ្យក្លាយជាជនបង្គោល។ លោកបានឱ្យដឹងថា វិទ្យាស្ថានបណ្តុះបណ្តាលគុនខ្មែរនេះ នឹងដើរតួជាមជ្ឈមណ្ឌលបណ្តុះបណ្តាលជំនាញឯកទេសគុនខ្មែរតែមួយគត់ ដែលផ្តោតលើការបណ្ដុះបណ្ដាលជំនាញគ្រូឯកទេសគុនខ្មែរ និងមន្ត្រីដឹកនាំការប្រកួតអាជ្ញាកណ្តាលចៅក្រមដល់សិក្ខកាមជនជាតិខ្មែរ និងសិក្ខាកាមបរទេស មកពីគ្រប់ប្រទេស ដើម្បីទទួលបានចំនេះជំនាញគុនខ្មែរ យកទៅបណ្តុះបណ្តាលនិងផ្សព្វផ្សាយគុនខ្មែរបន្តនៅទូទាំងសកលលោក។ 

បន្ថែមលើនេះ លោកបញ្ជាក់ថា សហព័ន្ធកីឡាប្រដាល់គុនខ្មែរ និងសមភាគីចិន ក៏នឹងរៀបចំឯកសារចុះបញ្ជីរបស់វិទ្យាស្ថានស្នើសុំការទទួលស្គាល់ពីក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា ដើម្បីឱ្យវិទ្យាស្ថានមួយនេះក្លាយជាកន្លែងបណ្ដុះបណ្ដាលមួយប្រកបដោយវិជ្ជាជីវៈច្បាស់លាស់ អំពីប្រវត្តិសាស្ត្រនៃគុនខ្មែរ និងបច្ចេកទេសនៃក្បាច់គុនខ្មែរផងដែរ។គួរបញ្ជាក់ថា វិទ្យាស្ថានបណ្ដុះបណ្ដាលគុនខ្មែរ មានទីតាំងនៅតាមបណ្តោយផ្លូវជាសុផារ៉ា ខណ្ឌឫស្សីកែវ រាជធានីភ្នំពេញ ត្រូវបានប្រកាសសម្ពោធជាផ្លូវការ កាលពីថ្ងៃទី១៨មិថុនា ឆ្នាំ២០២៥ ក្រោមការចូលរួមពី លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ, លោក លីវ អឺលី (Liu Erli) ប្រធានវិទ្យាស្ថានបណ្ដុះបណ្ដាលគុនខ្មែរ, តំណាងក្រសួងអប់រំ យុវជន និងកីឡា និងភាគីពាក់ព័ន្ធមួយចំនួនទៀត៕

ប្រភពរូបភាព៖ Khov Chhay