រលកកម្ដៅនៃរដូវក្តៅ បានបន្តវាយប្រហារប្រទេសអ៊ីតាលី ហើយនឹងបន្តកើនឡើងកាន់តែខ្ពស់នៅចុងសប្តាហ៍នេះ ដោយសីតុណ្ហភាពត្រូវបានគេរំពឹងថានឹងឡើងដល់ ៤០អង្សាសេ នៅក្នុងតំបន់មួយចំនួន នេះបើយោងតាមអាជ្ញាធរអ៊ីតាលី នៅថ្ងៃទី២៨ ខែមិថុនា ឆ្នាំ២០២៥នេះ។ ក្រសួង​សុខាភិបាល​អ៊ីតាលី ជូនដំណឹងសញ្ញាប្រុងប្រយ័ត្នពណ៌ក្រហមសម្រាប់​ទីក្រុង​ធំៗ​ចំនួន១២ រួម​ទាំង​ទីក្រុង Rome ទីក្រុង Milan និង​ទីក្រុង Turin សម្រាប់​ថ្ងៃ​សុក្រ និង​ចុង​សប្តាហ៍​បន្ទាប់។ ចំនួនទីក្រុងដែលស្ថិតនៅក្រោមការប្រកាសអាសន្នពណ៌ក្រហម ត្រូវបានគេរំពឹងថានឹងកើនឡើងដល់ចំនួន១៧ នៅថ្ងៃសៅរ៍ និងឡើងដល់២១ នៅថ្ងៃអាទិត្យ។

ជាក់ស្តែង “សញ្ញាព្រមានពណ៌ក្រហម” មានន័យថា កម្តៅអាចតំណាងឱ្យហានិភ័យសុខភាពសូម្បីតែសម្រាប់មនុស្សវ័យក្មេងដែលមិនមានបញ្ហាសុខភាពក៏ដោយក៏អាចរងគ្រោះដោយសាររលកកម្តៅនេះបាន។

គួរបញ្ជាក់ផងដែរថា រលកកម្ដៅខ្លាំង បានសម្លាប់មនុស្សរាប់ពាន់នាក់ក្នុងរយៈពេលប៉ុន្មានឆ្នាំចុងក្រោយនេះនៅអឺរ៉ុប ហើយនៅក្នុងឆ្នាំ ២០០៣ តែមួយ គឺមានមនុស្សស្លាប់ក្នុងចំនួនដ៏ច្រើនបំផុតប្រហែល ៧០០០០ នាក់ផងដែរ៕