អគ្គិភ័យដ៏ធំមួយនៅរោងចក្រផលិតក្រដាស់ជូតមាត់មួយកន្លែង ក្នុងតំបន់ឧស្សាហកម្ម Hemaraj ស្រុក Nong Khae ខេត្ត Saraburi ប្រទេសថៃ បានសម្លាប់មនុស្សយ៉ាងហោចណាស់ ៨ នាក់កាលពីរសៀលថ្ងៃច័ន្ទ និងបានបំផ្លាញឃ្លាំងស្ទើរតែទាំងស្រុង។ ក្រុមអ្នកពន្លត់អគ្គិភ័យបានព្យាយាមដាក់ពង្រាយរថយន្តទឹក និងរថយន្តពន្លត់អគ្គីភ័យ ដើម្បីពន្លត់ភ្លើង ប៉ុន្តែដោយសារតែវាជារោងចក្រផលិតក្រដាស់ជូតមាត់ ទើបវាឆេះរីករាលដាលយ៉ាងលឿន។ ក្រុមជួយសង្គ្រោះ បានរកឃើញសព​ចំនួន៨​នាក់ ​ខណៈមនុស្ស ២នាក់បន្តបាត់ខ្លូន នៅក្នុងហេតុការណ៍អគ្គិភ័យឆេះរោងចក្រ​ផលិតក្រដាស​ជូតមាត់នេះ។

 អភិបាលខេត្ត Saraburi លោក Bancha Chaowarin ដែលមានវត្តមាននៅកន្លែងកើតហេតុបាននិយាយថា ពួកគេជាបុគ្គលិកដែលធ្វើការនៅជាន់ទី២ និងជាន់ទី 3 នៃរោងចក្រ ហើយមិនអាចជម្លៀសចេញទាន់ពេល អំឡុងពេលដែលភ្លើងបានឆាបឆេះ។ រថយន្ត​ពន្លត់​អគ្គិភ័យ​ជាង​៥០​គ្រឿង​ត្រូវ​បាន​បញ្ជូន​ទៅ​ដល់​កន្លែង​កើតហេតុ ហើយ​​ភ្លើង​អាច​គ្រប់គ្រង​បានទាំងស្រុងត្រឹមម៉ោង១០យប់នៅថ្ងៃដដែល។

 ក្រុមរុករក និងជួយសង្គ្រោះកំពុងស្វែងរកអ្នកបាត់ខ្លួន ប៉ុន្តែមិនអាចចូលទៅក្នុងតំបន់មួយចំនួនបានទេ ដោយសាររចនាសម្ព័ន្ធមួយចំនួនបានដួលរលំ។ ដោយឡែកគេនៅមិនទាន់ដឹងពីមូលហេតុដែលនាំឲ្យមានអគ្គិភ័យនេះកើតឡើងងនៅឡើយទេ ដោយអាជ្ញាធរកំពុងធ្វើការស៊ើបអង្កេត៕