លោក PeyPey Dy អ្នកផលិតមាតិកាបែបកំប្លែង និងជាម្ចាស់ហាងបុកល្ហុង ក៏ដូចជាហាងកាហ្វេដ៏ល្បីមួយរូបនៅកម្ពុជា បានបង្ហោះសំណេរមួយ ដោយបានទទូចស្នើសុំដល់បងប្អូនខ្មែរទាំងអស់ជួយរួបរួមជាសម្លេង និងកម្លាំងសាមគ្គី ដើម្បីមានដំណោះស្រាយ ឲ្យសត្វដំរីកម្សត់ ឡាក់គី ទទួលបានលោក ទ្រី ស៊ីថេង ដែលអ្នកមើលថែដ៏ល្អមកវិញ។

នេះបើយោងតាមការបង្ហោះសំណេររបស់ លោក PeyPey Dy បានបង្ហាញពីអាមរ្មណ៍បែបនេះថា៖ «ពួកយើងសុទ្ធតែមានគោលបំណងតែមួយគឺចង់ឃើញសត្វទាំងអស់ទទួលបានជម្រក មានអាហារគ្រប់គ្រាន់ និងទទួលបានការស្រលាញ់ យ៉ាងណាមិញ វីដេអូដែលពួកយើងបានឃើញនោះ យើងក៏ប្រាកដក្នុងចិត្ត និងទទួលដឹងថា សត្វដំរី(Lucky)ក៏មានក្តីស្រលាញ់ចំពោះលោកពូដូចគ្នា ហើយរឹតតែមិនចង់បែកពីលោកពូទាល់តែសោះ»

លោកក៏បានបន្តទៀតថា៖ «ខ្ញុំជឿថា យើងទាំងអស់គ្នាក៏អាចក្លាយជាសម្លេងនិងកម្លាំងមួយដើម្បីមានដំណោះស្រាយ និងការយោគយល់ សូមឱ្យលោកពូត្រឡប់មកមើលថែLuckyវិញ មិនមែនដើម្បីតួនាទីតែដោយក្តីស្រលាញ់ដូចដែលគ្រប់គ្នាបានឃើញ»។

គួរបញ្ជាក់ផងដែរថា បន្ទាប់ពីឃើញវីដេអូឃ្លីបដ៏រំជួលចិត្តមួយនេះមានការចែករំលែកច្រើនពេញបណ្ដាញសង្គម ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏បានប្រកាសនឹងទទួលជួបលោក ទ្រី ស៊ីថេង (អ្នកមើលថែ សត្វដំរី ឡាក់គី) នាថ្ងៃស្អែក ទី៣ ខែកក្កដា ដើម្បីជួយរកដំណោះស្រាយផងដែរ៕ អត្ថបទដោយ៖ Sun Darasy