មនុស្ស ៣នាក់បានស្លាប់ និង៥៨នាក់ទៀតកំពុងបាត់ខ្លួន បន្ទាប់ពីកប៉ាល់ដឹកអ្នកដំណើរឈើមួយគ្រឿងត្រូវបានក្រឡាប់នៅក្បែរកោះបាលី របស់ប្រទេសឥណ្ឌូណេស៊ី នៅមុនពាក់កណ្តាលអធ្រាត្រថ្ងៃពុធ។ នេះបើតាមការបញ្ជាក់របស់មន្ត្រីជួយសង្គ្រោះជាន់ខ្ពស់ នៅថ្ងៃព្រហស្បតិ៍នេះ។លោក I Nyoman Sidakarya ប្រធានការិយាល័យស្រាវជ្រាវ និងជួយសង្គ្រោះនៅកោះបាលី បាននិយាយថា «មនុស្ស​ ៣​នាក់​ត្រូវ​បាន​គេ​ប្រទះ​ឃើញ​ស្លាប់ ហើយ​ ៤​នាក់​ផ្សេង​ទៀត​ត្រូវ​បាន​គេ​ជួយ​សង្គ្រោះ​។ កប៉ាល់នោះមានអ្នកដំណើរសរុបចំនួន ៥៣នាក់ និងសមាជិកនាវិក ១២នាក់។ នាវាដែលបានលិចនោះមានឈ្មោះថា Tunu Pratama Jaya Penumpang Motor ត្រូវបានវាយប្រហារដោយរលកដ៏ធំ ខណៈពេលដែលកំពុងធ្វើដំណើរតាមព្រំដែនសមុទ្ររវាងកោះ Bali និង East Java»។បច្ចុប្បន្ន ប្រតិបត្តិការស្វែងរក និងជួយសង្គ្រោះកំពុងដំណើរការ ដោយមានការចូលរួមពីក្រុមមកពីកោះបាលី និងជ្វាខាងកើត។ ក្នុងប្រតិបត្តិការនេះមានអ្នកជួយសង្គ្រោះសរុបចំនួន ៣៥នាក់មកពីកោះបាលី ត្រូវបានដាក់ពង្រាយ រួមជាមួយនឹងនាវាជួយសង្គ្រោះ និងទូកកៅស៊ូផងដែរ៕