អ្នកឧកញ៉ា កុក អាន ត្រូវបានគេស្គាល់ថា ជាអ្នកមានឥទ្ធិពល ដែលជាម្ចាស់ទីតាំងដ៏ធំមួយនៅប៉ោយប៉ែត ដែលជាប់ពាក់ព័ន្ធនឹងល្បែងអនឡាញ មជ្ឈមណ្ឌលហៅទូរស័ព្ទ (call center) ត្រូវបានប៉ូលិសថៃ ឆ្មក់ចូលក្នុងទីតាំង ១៩កន្លែង និងរឹបអូសបានរថយន្តទំនើបៗជាច្រើនគ្រឿង និងលុយប្រមាណ ២៧លានបាត នៅទីក្រុងបាងកក ខេត្ត Samut Prakan និងខេត្ត Chonburi ក្រោមប្រតិបត្តិការឧក្រិដ្ឋកម្មឆ្លងដែន និងលាងលុយកខ្វក់។ នេះបើតាមការចុះផ្សាយរបស់ សារព័ត៌មានថៃ Khoasod នៅថ្ងៃទី៨ ខែកក្កដា ឆ្នាំ២០២៥នេះ។ទីតាំង​សំខាន់​មួយ​ដែល​ត្រូវ​បាន​ឆែកឆេរ​នោះ​គឺ​ផ្ទះ​មួយ​កន្លែង​ ក្រោយដីកា​វ​ឆែកឆេររបស់​តុលាការ​ព្រហ្មទណ្ឌ​បាន​អនុវត្ត​ដើម្បី​ស្វែង​រក​ភស្តុតាង និង​ចាប់​ខ្លួន​លោក កុក អាន ម្ចាស់​កាស៊ីណូ Crown Casino Resort (អគារ ២៥ ជាន់ / អគារ ១៨ ជាន់ / មូលដ្ឋាន​មជ្ឈមណ្ឌល​ទូរស័ព្ទ​ធំ​នៅ​ក្រុង​ប៉ោយប៉ែត) ដែល​ចោទ​ថា​បាន​ឆបោក​ប្រជាជន​ថៃ​នៅ​កម្ពុជា។តាមការចុះផ្សាយដោយសារពត៌មានថៃដដែលបានឲ្យដឹងទៀតថា ការស្វែងរកនេះគឺជាលទ្ធផលនៃ CCIB លេខ 172/2568 ចុះថ្ងៃទី២៦ ខែមិថុនា ឆ្នាំ២០២៥ ដែលបានបង្កើតគណៈកម្មាធិការស៊ើបអង្កេតមួយដើម្បីស៊ើបអង្កេតករណីពាក់ព័ន្ធនឹងអង្គការឧក្រិដ្ឋកម្ម។ ករណីទាំងនេះពាក់ព័ន្ធនឹងអង្គការឧក្រិដ្ឋកម្មឆ្លងដែនដែលមានបុគ្គលដែលមានសញ្ជាតិច្រើន ដោយមានការបែងចែកការងារជារចនាសម្ព័ន្ធ។ មជ្ឈមណ្ឌលប្រតិបត្តិការត្រូវបានបង្កើតឡើងនៅទីតាំងផ្សេងៗក្នុងក្រុងប៉ោយប៉ែត ដូចជាអគារ ២៥ជាន់ អគារ ១៨ជាន់ អគារHISO និងកាស៊ីណូក្រោនផងដែរ៕​