អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា បានប្រកាសបញ្ចប់ទំនាក់ទំនងជាមួយសម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បន្ទាប់ពីមានរឿងបែកធ្លាយសម្លេងរវាងសម្តេចតេជោ ហ៊ុន សែន និងអតីតនាយករដ្ឋមន្ត្រីថៃ លោកស្រី ផែថុងថាន ស៊ីណាវ៉ាត់ បច្ចុប្បន្នជារដ្ឋមន្ត្រីក្រសួងវប្បធម៌ ដែលបានធ្វើឱ្យរដ្ឋាភិបាលថៃធ្លាក់ក្នុងភាពចលាចល។

ជាក់ស្តែង ក្នុងសេចក្តីថ្លែងការណ៍មួយ លោក ថាក់ស៊ីន បាន​លើកឡើងថា លោក​មាន​ការ​ភ្ញាក់ផ្អើល​ជា​ខ្លាំង​ដែល​សម្តេចតេជោ ហ៊ុន សែន ​បញ្ចេញ​សារសំឡេង ដែល​កូនស្រីរបស់​លោក គឺលោកស្រី ផែថុងថាន ស៊ីណាវ៉ាត់ បាននិយាយ​​រិះគន់​ទៅដល់យោធា​របស់​ប្រទេសខ្លួន (ប្រទេស​ថៃ) ជុំវិញការបិទព្រំដែនដោយឯកតោភាគី។ ហើយការបែកធ្លាយនេះបានបង្កឱ្យមានការតវ៉ាដ៏ខ្លាំង និងរង្គោះរង្គើរនាំទៅដល់ការចាកចេញពីគណបក្សចម្រុះដ៏សំខាន់មួយក្នុងរដ្ឋាភិបាលថៃ។

ជារួម ចាប់តាំងពីពេលនោះមក តុលាការធម្មនុញ្ញថៃ ពោលគឺកាលពីថ្ងៃទី០១ ខែកក្កដា ឆ្នាំ២០២៥ បានសម្រេចព្យួរតួនាទីនាយករដ្ឋមន្ត្រីថៃ លោកស្រី ផែថុងថាន ស៊ីណាវ៉ាត់ ដោយរង់ចាំការពិចារណាទៅលើសំណុំរឿងប្រឆាំងនឹងលោកស្រីពាក់ព័ន្ធនឹងការសន្ទនាតាមទូរស័ព្ទដ៏ចម្រូងចម្រាសមួយជាមួយប្រធានព្រឹទ្ធសភាកម្ពុជា សម្តេចតេជោ ហ៊ុន សែន​ នេះផងដែរ៕