នាថ្ងៃទី០៩ ខែកក្កដា ឆ្នាំ២០២៥ វេលាម៉ោង០៧:៣០នាទី មានករណីអគ្គិភ័យមួយកើតឡើង បណ្ដាលឱ្យឆេះបន្ទប់ស្នាក់នៅកម្មករចំនួន ០១ខ្នង បង្កឲ្យមានការភ្ញាក់ផ្អើលនៅចំនុចចក្រុមហ៊ុន បៃសិងសេង ខេមបូឌា អិនដាសស្រ្ទី ខូលអិលធីឌី នៅក្រុមទី០១ ស្ថិតក្នុងភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង។

ក្នុងហេតុការណ៍នេះបណ្ដាលឲ្យ(ខូចខាត៧០%) ឆេះបន្ទប់ស្នាក់នៅកម្មករចំនួន ០១ខ្នង, ឆេះម៉ូតូចំនួន០១គ្រឿង, ឆេះឯកសារ, ឆេះខោអាវ និងសម្ភារៈប្រើប្រាស់ផ្សេងៗ គិតជាទឹកប្រាក់ប្រហែល ៥០,០០០ ដុល្លារ (ប្រាំម៉ឺនដុល្លារសហរដ្ឋអាមេរិក) ។

ប្រភេទសំណង់មានទំហំ ១០ម៉ែត្រ x ២៤ម៉ែត្រ កម្ពស់០៣ម៉ែត្រ (មាន ១៦បន្ទប់) សង់អំពីដែកជញ្ជាំងស័ង្កសី ដំបូលប្រក់ស័ង្កសី។

សមត្ថកិច្ចជំនាញ បានឲ្យដឹងថា៖ ក្នុងករណីអគ្គិភ័យនេះ បណ្ដាលមកពីឆ្លងចរន្តអគ្គិសនី ទើបបណ្តាលអោយមានអគ្គិភ័យ យ៉ាងណាមិញ មិនបានបង្កគ្រោះថ្នាក់ដល់អាយុជីវិតមនុស្ស និងឆ្លងទៅអ្នកជិតខាងឡើយ។ 

ករណីនេះដែរកម្លាំងនគរបាលស្រុករតនមណ្ឌល ដឹកនាំដោយលោកវរសេនីយ៍ឯក សន និល អធិការនគរបាលស្រុករតនមណ្ឌល បានចុះពន្លត់អគ្គិភ័យ នេះដោយប្រើប្រាស់រថយន្តពន្លត់អគ្គិភ័យចំនួន ០១គ្រឿង ប្រើប្រាស់ទឹកអស់ចំនួន ០២ឡាន ទើបគ្រប់គ្រងស្ថានការណ៍ អគ្គិភ័យនេះបានទាំងស្រុង៕