ដាណា ភីន កូនស្រីបណ្ដូលចិត្តតែម្នាក់របស់ ថៅកែហាងពេជ្រ លោកស្រី ទ្រី ដាណា បានធ្វើឲ្យមហាជនងាកមកចាប់អារម្មណ៍ជាថ្មីម្ដងទៀត ខណៈរូបនាងបានចូលទៅហ្វឹកហាត់ទាហាន ក្នុងគោលបំណងដើម្បីចង់ដឹងពីសុខទុក្ខកងទ័ព ដោយវីដេអូឃ្លីបនេះទទួលបានការចាប់អារម្មណ៍ និងមានអ្នកចុចចូលទស្សនាយ៉ាងច្រើន ក្នុងនោះក៏មានអ្នកលើកសរសើរថាពិតជាក្លាហាន និងមានភាពរឹងមាំមែន សឹងតែបុរសខ្លះស៊ូទ្រាំមិនបានដូចផង។

ដោយមួយរយៈពេល ក្រោយបញ្ចប់ពីការសិក្សានៅវិទ្យាល័យទទួលបាននិទ្ទេស A ក្នុងលទ្ធផលប្រឡងថ្នាក់មធ្យមសិក្សាទុតិយភូមិ ឆ្នាំ២០២៤ ដាណា ភីន ហាក់មានសកម្មភាពច្រើននៅក្នុងបណ្ដាញសង្គម តែងតែមានវិដេអូមាតិកាថ្មីប្លែក ដូចជាការធ្វើដំណើរកម្សាន្ត និងសកម្មភាពថ្មីៗដែលជាចំណីចក្ខុដ៏ទាក់ទាញចិត្តមហាជនឲ្យស្រលាញ់ពេញចិត្ត ដែលមានអ្នកចុចចូលទស្សនាខ្ទង់លានដងក្នុងវីដេអូនីមួយៗ។

គួរបញ្ជាក់ផងដែរថា ដាណា ភីន គឺជាកូនស្រីច្បងតែម្នាក់គត់របស់ លោកស្រី ទ្រី ដាណា ដោយកូនស្រីរូបនេះ គឺប្រកបដោយគន្លងធម៌ចេះស្ដាប់បង្គាប់ម្ដាយ ចាស់ទុំ ព្រមទាំងរៀនពូកែថែមទៀតផង បើទោះបីជានាងមានជីវភាពធូរធារក៏ពិតមែន តែ ដាណា ភីន នៅតែបង្ហាញភាពសាមញ្ញ ដែលត្រង់ចំណុចនេះហើយបានធ្វើឲ្យគ្រប់គ្នាកោតសរសើរពីឆន្ទះ និងការខិតខំប្រឹងប្រែងរបស់ប្អូនស្រីផងដែរ៕ អត្ថបទដោយ៖ Sun Darasy