មេដឹកនាំកូរ៉េខាងជើងលោក Kim Jong Un បានប្រាប់អ្នកការទូតកំពូលរបស់រុស្ស៊ីថា ប្រទេសរបស់លោកត្រៀមខ្លួនជាស្រេចដើម្បីគាំទ្រដោយគ្មានលក្ខខណ្ឌ រាល់សកម្មភាពដែលធ្វើឡើងដោយទីក្រុងមូស្គូ ដើម្បីដោះស្រាយជម្លោះក្នុងប្រទេសអ៊ុយក្រែន នេះបើតាមប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យ នេះ ខណៈដែលប្រទេសទាំងពីរបានពិភាក្សាជាយុទ្ធសាស្ត្រកម្រិតខ្ពស់។

រដ្ឋមន្ត្រីការបរទេសរុស្ស៊ីលោក Sergei Lavrov កំពុងបំពេញទស្សនកិច្ចរយៈពេលបីថ្ងៃទៅកាន់ប្រទេសកូរ៉េខាងជើង ដែលបានផ្តល់កងទ័ពនិងសព្វាវុធសម្រាប់សង្គ្រាមរុស្ស៊ីជាមួយអ៊ុយក្រែន និងបានសន្យាគាំទ្រផ្នែកយោធាបន្ថែមទៀត ។ លោក Kim បានជួបលោក Lavrov នៅទីក្រុង Wonsan ឆ្នេរសមុទ្រភាគខាងកើត ជាកន្លែងដែលរដ្ឋមន្ត្រីការបរទេសនៃប្រទេសទាំងពីរបានបើកកិច្ចសន្ទនាយុទ្ធសាស្ត្រលើកទីពីររបស់ពួកគេ ដោយបានសន្យាកិច្ចសហប្រតិបត្តិការបន្ថែមទៀតក្រោមសន្ធិសញ្ញាភាពជាដៃគូដែលបានចុះហត្ថលេខាកាលពីឆ្នាំមុន ដែលរួមមានសន្ធិសញ្ញាការពារទៅវិញទៅមក។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ថា លោក Kim បានប្រាប់លោក Lavrov ជំហានដែលធ្វើឡើងដោយសម្ព័ន្ធមិត្ត ដើម្បីឆ្លើយតបទៅនឹងការវិវត្តន៍នៃភូមិសាស្ត្រនយោបាយសកលនឹងរួមចំណែកយ៉ាងធំធេងក្នុងការធានាសន្តិភាព និងសន្តិសុខជុំវិញពិភពលោក៕