ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្ដីបំភ្លឺព័ត៌មានជូនសាធារណជនឲ្យបានជ្រាបថា បន្ទាប់ពីមានផេកហ្វេសប៊ុកឈ្មោះ Ka Green ដែលបានថតក្បួនរថយន្ត ប្រតិភូ ស្នងការដ្ឋាននគរបាលខេត្តកណ្តាល ក្នុងភូមិសាស្រ្តខេត្តកំពង់ធំ និងបង្ហោះដោយប្រើពាក្យសំដីអសិលធម៌ ជេរប្រមាថមកលើថ្នាក់ដឹកនាំ និងក្បួនប្រតិភូ នៃស្នងការដ្ឋាននគរបាលខេត្តកណ្តាលដែលបានអញ្ជើញត្រឡប់ពីការអញ្ជើញសំណេះសំណាល សួរសុខទុក្ខ នាំយកសម្ភារ បរិក្ខារ គ្រឿងឧបភោគបរិភោគ ឱសថ និងថវិកា ផ្តល់ជូនគណៈបញ្ជាការនគរបាលជាតិប្រចាំទិសភូមិភាគទី៤ ខេត្តព្រះវិហារ។

ពាក់ព័ន្ធករណីនេះ ម្ចាស់គណនីផេកហ្វេសប៊ុកឈ្មោះ Ka Green ត្រូវចូលខ្លួនមកបំភ្លឺជាបន្ទាន់ និងធ្វើវីដេអូ សុំទោសចំពោះទង្វើដែលបានប្រមាថមកលើថ្នាក់ដឹកនាំ និងប្រតិភូ នៃស្នងការដ្ឋាននគរបាលខេត្តកណ្តាល។

យ៉ាងណាមិញបន្ទាប់ពីបានឃើញការកោះហៅឲ្យចូលខ្លួនបំភ្លឺរួចមក ម្ចាស់គណនី Ka Green រូបនេះ ក៏បានដឹកនូវកំហុសព្រមចេញនៅវីដេអូសុំទោសជាសាធារណៈ ដល់ថ្នាក់ដឹកនាំ ដែលបានប្រើពាក្យសំដីអសិលធម៌ ដោយសារតែនាងយល់ច្រឡំស្មានតែក្បូនរថយន្តរបស់អ្នកលក់ឡេ បន្ថែមពីនេះនាងក៏បានលុបវីដេអូនេះចេញ ព្រមទាំងសំណូមពរដល់អ្នកលេងបណ្ដាញសង្គមទាំងអស់បញ្ឈប់ការចែកចាយបន្តផងដែរ៕