នៅព្រឹកថ្ងៃទី១៧ ខែកក្កដា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ បានដឹកនាំកងកម្លាំងចម្រុះ បង្ក្រាបឧបករណ៍ល្មើសនេសាទខុសច្បាប់ នៅមាត់តំបន់បឹងទន្លេសាប និងមាត់បឹងទន្លេឆ្មា ក្នុងរដូវបិទនេសាទ នៅឃុំពាមបាង ស្រុកស្ទោង ខេត្តកំពង់ធំ។ ជាលទ្ធផល បទល្មើសនេសាទជាទ្រង់ទ្រាយធំ មិនមានការកើតឡើងជាថ្មីទៀតទេ ពិសេសការលួចឆក់ត្រី និងការអូសត្រជាក់ ត្រូវកងកម្លាំងយើងលុបបំបាត់បានស្ទើរតែទាំងស្រុង។ តែដោយឡែកនៅតែមានជនខិលខូចមួយចំនួន នៅតែបន្តលបលួចធ្វើសកម្មភាពដាក់ឧបករណ៍ល្មើសនេសាទខុសច្បាប់ដូចជា របាំងស្បៃអួនខុសទំហំ និងប្រវែងកំណត់ និងរបាំស្បៃមុង ដែលច្បាប់បានហាមឃាត់ដាច់ខាត នៅក្នុងភូមិសាស្ត្រព្រៃលិចទឹក ដែលជាតំបន់ជម្រកត្រីពងកូន នៅក្នុងរដូវបិទនេសាទនេះ ទោះបីកម្លាំងយើងធ្វើសកម្មភាពបង្ក្រាបជារៀងរាល់ថ្ងៃក្តី។ជាមួយគ្នានេះ ឧត្តមសេនីយ៍ទោ សោម ស៊ុន បានអំពាវនាវដល់ប្រជាពលរដ្ឋទាំងអស់ សូមមេត្តាកុំប្រើប្រាស់ឧបករណ៍នេសាទ នឹងធ្វើសកម្មភាពនេសាទខុសច្បាប់ ក្នុងរដូវបិទនេសាទនេះ ដើម្បីរក្សាធនធានមច្ឆជាតិរបស់យើងឱ្យសំបូរឡើងវិញ និងសម្រាប់កូនចៅយើងនៅជំនាន់ក្រោយៗទៀត​ផងដែរ៕