នៅវេលាម៉ោង​ ៨និង៥០នាទីយប់ ថ្ងៃទី១៩​ ខែកក្កដា ឆ្នាំ២០២៥ មានករណីអគ្គិភ័យឆាបឆេះអគារខុនដូរ​មួយកន្លែង​យ៉ាងសន្ធោសន្ធៅ បង្កឲ្យមានការភ្ញាក់ផ្អើលជាខ្លាំងដល់ប្រជាពលរដ្ឋ នៅចំណុចផ្ទះលេខ១៩២៦ ផ្លូវ២១៧ ភូមិទ្រា២​ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។

ក្នុងប្រតិបត្តិការខាងលើនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន០៧គ្រឿង ក្នុងនោះរថយន្តការិយាល័យរាជធានីភ្នំពេញ​ ចំនួន០៦គ្រឿង ប្រេីប្រាស់ទឹក​អស់០១ឡាន​ ស្មេីរនឹង០៤ម៉ែត្រគូប​ និងរថយន្តជំនួយរបស់ក្រុមហ៊ុន​ ស្រាបៀរកម្ពុជា ចំនួន០១គ្រឿង​ ពុំបានប្រេីប្រាស់ទឹក។ ដោយឡែកចំពោះប្រភេទសំណង់ គឺជាប្រភេទ ថ្មបេតុង​ ទំហំ​ (៣០ម៉ែត្រ​ x ១៥ម៉ែត្រ) ឆេះម៉ាស៉ីនបោកខោអាវ​ រួមសម្ភារៈមួយចំនួន ហើយពុំបណ្តាលឲ្យឆេះរាលដាលដល់ផ្ទះអ្នកក្បែរខាងឡើយ។ ករណីអគ្គិភ័យនេះ ត្រូវបានកម្លាំងសមត្ថកិច្ចជំនាញរបស់យើងគ្រប់គ្រងបានទាំងស្រុងនៅម៉ោង ៩និង១៥នាទីយប់នាថ្ងៃខែឆ្នាំដដែរ។

ជុំវិញហេតុការណ៍គ្រោះអគ្គិភ័យ កម្លាំងសមត្ថកិច្ចជំនាញបានធ្វើការស្រាវជ្រាវរកឃើញថា គឺបណ្តាលមកពីការឆ្លងចរន្តអគ្គីសនីបង្ករជាអគ្គិភ័យ និងបានបណ្តាលឲ្យមានមនុស្សម្នាក់រងរបួសនៅក្នុងហេតុការណ៍គ្រោះអគ្គិភ័យនេះផងដែរ៕