កប៉ាល់​ទេសចរណ៍​មួយ​គ្រឿង​បាន​ក្រឡាប់​នៅ​ឈូងសមុទ្រ Ha Long ខេត្ត Quang Ninh ភាគ​ខាងជើង​ប្រទេស​វៀតណាម បន្ទាប់ពី​មាន​ខ្យល់ព្យុះ​មួយ​បានវាយប្រហារយ៉ាងខ្លាំងក្លា។ នេះបើយោងតាម ទីភ្នាក់ងារព័ត៌មានវៀតណាម បានរាយការណ៍នៅថ្ងៃអាទិត្យ ទី២០ ខែកក្កដានេះ។​ទូកទេសចរណ៍នេះដឹកអ្នកដំណើរសរុបចំនួន ៤៨ នាក់ ប្រុស ២៤ នាក់ និងស្ត្រី ២៤ នាក់ ដែលភាគច្រើនជាយុវជន និងកុមារ។ ក្រោយប្រតិបត្តិការជួយសង្គ្រោះ មានមនុស្សសរុបចំនួន ៤៧នាក់ ត្រូវបានរកឃើញ ក្នុងនោះមានអ្នកនៅរស់រានមានជីវិតចំនួន ១០នាក់ និង ៣៧នាក់ទៀតបានស្លាប់ និងម្នាក់ទៀតកំពុងបាត់ខ្លួន។ ក្រោយសោកនាដកម្មនេះបានកើតឡើង នាយករដ្ឋមន្ត្រី Pham Minh Chinh ក៏បានចូលរួមរំលែកទុក្ខយ៉ាងក្រៀមក្រំចំពោះក្រុមគ្រួសារនៃសព ហើយបានអំពាវនាវឱ្យមានការស៊ើបអង្កេតឱ្យបានហ្មត់ចត់លើឧបទ្ទវហេតុនេះ។

គួរបញ្ជាក់ផងដែរថា ឧបទ្ទវហេតុនេះបានកើតឡើងកាលពីថ្ងៃសៅរ៍ ប្រហែលម៉ោង ១៖៣០នាទីរសៀលម៉ោងក្នុងស្រុក រហូតមកដល់ម៉ោង ២៖០៥នាទីរសៀល កប៉ាល់បានដាច់ទំនាក់ទំនងជាមួយអាជ្ញាធរទាំងអស់ ហើយបានលិចចូលទៅក្រោមទឹកនៃឈូងសមុទ្រផងដែរ៕