លោក ផន ផល្លា ដែលគ្រប់គ្នាស្គាល់យ៉ាងច្បាស់ថាជាប្រធានមណ្ឌលមែកឈើ​ បានធ្វើឲ្យមហាជនអ្នកលេងបណ្ដាញសង្គមផ្ទុះការកោតសរសើរ និងស្ងប់ស្ញែរជាខ្លាំង ខណៈលោកបានបង្ហាញនៅប្លង់មណ្ឌលចាស់ជរា ដែលលោកមានគម្រោងត្រៀមនឹងសាងសង់នាពេលឆាប់ៗខាងមុខនេះ ក្នុងនោះលោកបានបង្ហើបពីឈ្មោះមណ្ឌលនោះថា «មណ្ឌលចាស់ជរា ដើមឈើចុងក្រោយ» មណ្ឌលនេះរៀបចំឡើងក្នុងគោលបំណង ជួយដល់ លោកតាលោកយាយចាស់ជរាគ្មានទីពឹងគ្មានទីជម្រក មិនអាចប្រកបរបរអ្វីបាន លោកនឹងនាំយកមកស្នាក់នៅដើម្បីទទួលការមើលថែឲ្យបានដិតដល់នៅក្នុងជីវិតចុងក្រោយរបស់គាត់។

នេះបើយោងតាមការបង្ហោះរបស់របស់ លោក ផន ផល្លា បានបង្ហាញពីរូបភាពអបជាមួយសំណេរបែបនេះថា៖ «ប្លង់មណ្ឌលចាស់ជរា ដែលខ្ញុំត្រៀមសាងសង់ ប្រទេសយើងចាប់ផ្តើមមានមណ្ឌលចាស់ជរាហើយ»។

គួរបញ្ជាក់ផងដែរថា លោក ផន ផល្លា ជាបុគ្គលមួយរូបដែលមានចិត្តសប្បុរសធម៌តែងតែមានមុខក្នុងការងារសង្គម ជាពិសេសគឺជួយទៅដល់កុមារដែលងាយរងគ្រោះ ក៏ដូចជាកុមារមានជម្ងឺ និងពិការភាពជាដើម ដោយកុមារទាំងនោះត្រូវបានលោកយកមកព្យាបាល និងមើលថែនៅមណ្ឌលមែកឈើ ដោយបច្ចុប្បន្នមានកុមារប្រមាណជិត ២០០នាក់ ត្រូវចិញ្ចឹមបីបាច់យ៉ាងយកចិត្តទុកដាក់នៅក្នុងមណ្ឌល ដែលត្រង់ចំនុចនិងទឹកចិត្តដ៏ប្រពៃរបស់លោកនេះហើយទើប លោក ផន ផល្លា ទទួលបានការស្រលាញ់ពេញចិត្តពីពលរដ្ឋខ្មែរជាច្រើនផងដែរ៕ សម្រួលដោយ៖Sun Darasy