AirPods 2 បានបង្ហាញវត្តមានលើទីផ្សារប្រទេសកម្ពុជាបណ្ដើរៗហើយ ក្រោយពីបានចេញលក់ជាផ្លូវការនៅលើទឹកដីសហរដ្ឋអាមេរិក កាលពីថ្ងៃទី ២៧ ខែមីនាកន្លងទៅ។

នៅសហរដ្ឋអាមេរិក AirPods ជំនាន់ថ្មីនេះ មានលក់ចែកចេញជាពីរប្រភេទ គឺទីមួយប្រភេទមានប្រអប់សាកធម្មតាតម្លៃ ១៥៩ ដុល្លារ និងទីពីរជាប្រភេទមានប្រអប់សាកឥតប្រើខ្សែ (Wireless) មានតម្លៃ ១៩៩ ដុល្លារ។

ដោយឡែកនៅកម្ពុជាឯណេះវិញ សង្កេតឃើញមានលក់តែកាស AirPods ប្រើប្រអប់សាកឥតប្រើខ្សែតែប៉ុណ្ណោះ ដោយហាងលក់មួយចំនួនបានកំណត់តម្លៃលក់ ២៧០ ដុល្លារ។

គួរដឹងថា AirPods ជំនាន់ទី ២ មានការបន្ថែមមុខងាររសើប ៣ ទាក់ទិននឹងការគាំទ្រឧបករណ៍សាកថ្មឥតខ្សែ ការពង្រឹងថាមពលថ្ម និងការបញ្ជាដោយសំឡេង Hey-Siri (ប្រភេទ Hands-free)។ ម៉ូដែលថ្មីនេះក៏អាចធ្វើការផ្លាស់ប្ដូរឧបករណ៍បានរហ័សជាងមុន សម្រាប់អ្នកភ្ជាប់ AirPods ទៅកាន់ឧបករណ៍ច្រើនដូចជា iPhone និង MacBook។ ជាមួយការបំពាក់នូវបន្ទះឈីប H1 ជំនាន់ថ្មី គាំទ្រមុខងារ Bluetooth 5.0 ឡើងពីជំនាន់ 4.2 អាចជួយសន្សំសំចៃថ្មបានច្រើន ពោលគឺអាចប្រើប្រាស់ដល់រយៈពេល ២៤ ម៉ោងពេញ៕