យន្តហោះចម្បាំងដ៏ទំនើបជំនាន់ទី​៤របស់បារាំង ​មានតម្លៃខ្ពស់ជាងយន្តហោះចម្បាំងទំនើបបំផុតរបស់អាមេរិក​ F-35 រហូតដល់ទៅ​៣ដង និងមានតម្លៃថ្លៃជាងយន្តហោះ​ចម្បាំងរបស់រុស្ស៊ី Su-57 រហូត​ដល់ទៅ​៩ដង។ ថ្វីបើទោះបីវាមានតម្លៃថ្លៃខ្ពស់ប៉ុនណាក្ដី ក៏មានអតិថជន​ទិញដែរ ។

សារព័ត៌មាន​របស់ចិន ​ Sina  បានផ្សាយថា យន្តហោះចម្បាំងប្រភេទ​ Dassault Rafale ​ដែលបារាំង​នឹងបញ្ចូនទៅឲ្យប្រទេសកាតា នាពេលខាងមុខនេះ គឺមានតម្លៃថ្លៃជាងគេបំផុត នៅក្នុងចំណោមយន្តហោះចម្បាំងទំនើបៗបំផុតរបស់ពិភពលោក​។

បើតាមគម្រោងយន្តហោះ​ Dassault Rafale នឹងផ្តល់ជូនប្រទេសកាតារ នៅឆ្នាំ២០២៣​ ដោយមានតម្លៃសរុបរហូតដល់ចំនួន​៣៥​គ្រឿង ដែលមានទឹកប្រាក់សរុបដល់ទៅ​១០,៧ពាន់លានដុល្លារ រួមទាំងអាវុធ​ គ្រាប់រំសេវជាច្រើនទៀត។ បើគិតក្នុងមួយគ្រឿងៗ មានតម្លៃ​ជិត ៣០០លានដុល្លារ​។

ដោយឡែកយន្តហោះចម្បាំងជំនាន់ទី​៥របស់អាមេរិក​ F-35 មានតម្លៃតែ​១០០លានដុល្លារប៉ុណ្ណោះ​ ហើយបើយន្តហោះជំនាន់ទី​៥របស់រុស្ស៊ីដូចគ្នា គឺ​Su-57 មានតម្លៃតែជាង​៣៤លានដុល្លារប៉ុណ្ណោះ ។ ទាំងនោះបង្ហាញឲ្យឃើញថា ​​យន្តហោះចម្បាំងរបស់បារាំង មានតម្លៃថ្លៃខ្ពស់ជាងគេបង្អស់លើពិភពលោក​។

ផ្ទុយពីនេះ យន្តហោះចម្បាំងដែលមានតម្លៃថ្លៃបំផុតរបស់បារាំងនោះ គឺមិនមែនតែយន្តហោះនោះឡើយ គឺមានទាំងអាវុធដែលបំពាក់នៅលើយន្តហោះស្រាប់ មានទាំងមីស៊ីលគ្រាប់រំសេវជាច្រើន ដែលអាចវាយប្រហារបាន ដោយមិនចាំបាច់ទិញមីស៊ីលមកបំពាក់ទៀតឡើយ៕ MEO085