Sreyly
· 2019-07-31
លោក Solskjaer ថា Bailly នឹងត្រូវខកខានការប្រកួតពី៤ ទៅ៥ខែ
#កីឡាករ Eric Bailly# #កីឡា# #បាល់ទាត់អន្តរជាតិ# #លោក Ole Gunnar Solskjaer#
10
លោក Ole Gunnar Solskjaer បានលើកឡើងថា កីឡាករ Eric Bailly ប្រហែលជាមិនអាចលេងបានទេនៅក្នុងរដូវកាលថ្មីនេះ ក្រោយពេលដែលគេវះកាត់ជង្គង់រួច។
កីឡាករដែលមានវ័យ ២៥ឆ្នាំរូបនេះបានរងរបួសជង្គង់ពេលប្រកួតមិត្តភាពជាមួយក្លឹប Tottenham នៅប្រទេសចិនកាលពីសប្ដាហ៍មុន។
សញ្ញាដំបូងមិនល្អនោះទេ ហើយ Bailly ប្រហែលជាមិនអាចលេងបានទេក្នុងឆ្នាំ២០១៩ ដោយសារគេក៏មានបញ្ហារបួសជង្គង់ដែរក្នុងរដូវកាលមុន។
លោក Ole Gunnar Solskjaer បានបញ្ជាក់ព័ត៌មាននេះក្រោយពេលទស្សនាក្រុមរបស់លោកនាំមុខក្រុមណរវ៉េយស៍ Kristiansund ១ទល់នឹងសូន្យកាលពីថ្ងៃអង្គារម្សិលមិញនេះ។
លោកបាននិយាយថា៖ “Eric បានទទួលការវះកាត់រួចហើយ គេនឹងត្រូវសម្រាកពី៤ ទៅ៥ខែ។ យើងសង្ឃឹមថាគេអាចចូលលេងវិញបានក្នុងអំឡុងជិតបុណ្យណូអែល”។
លោក Solskjaer បានទទួលស្គាល់ថាក្រុមរបស់លោកសំណាងហើយដែលអាចឈ្នះការប្រកួតមិត្តភាព ៥លើកជាប់គ្នា។
កូនប្រុសរបស់លោក Solskjaer គឺ Noah ដែលលេងឱ្យក្រុម Kristiansund បានប្ដូរចូល នៅក្នុងនាទីដែលក្លឹបកំពុងតែលំបាក ខណៈដែលកូនប្រុសពៅរបស់គាត់គឺ Elijah នៅអង្គុយក្បែរគាត់ទស្សនាការប្រកួតនេះពីដើមដល់ចប់។
នៅពេលត្រូវគេសួរថាតើគ្រួសាររបស់គាត់មានមោទនភាពចំពោះការប្រកួតនេះឬទេ លោក Solskjaer បាននិយាយថា៖ “ខ្ញុំគិតថាអញ្ចឹង ព្រោះ Noah បានចូលលេងជាលើកដំបូងនៅចំពោះមុខអ្នកទស្សនា ២៨ ០០០នាក់។ យុវជនសញ្ជាតិណរវ៉េយស៍មិនងាយមានឱកាសបែបនេះនោះទេ។ Elijah នៅអង្គុយក្បែរខ្ញុំជាប់រហូត គាត់ពេញចិត្តនឹងការប្រកួតនេះណាស់”។
ក្រុមបិសាចក្រហមនឹងជួបប្រកួត International Champions Cup ជាមួយក្លឹប AC Milan នៅថ្ងៃសៅរ៍នេះ៕
សេចក្តីថ្លែងការណ៍លើកលែង
អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។
ស្នាដៃពេញនិយមរបស់គាត់
យោបល់ទាំងអស់ (0)