បច្ចុប្បន្ន ទីផ្សារការងារ ពិតជាមានការប្រកួតប្រជែងយ៉ាងខ្លាំង ដែលយើងអាចនិយាយបានថា វាពិតជាចង្អៀតណាស់សម្រាប់បុគ្គលមួយចំនួន។ តែផ្ទុយទៅវិញ វាក៏មានភាពទូលាយផងដែរ សម្រាប់បុគ្គល ដែលមានសក្តានុពល ប្រកបដោយការយល់ដឹង និងបទពិសោធន៍។ នេះក៏ព្រោះតែពួកគេយល់ និងដឹងពីវិធីដើម្បីទទួលបានឱកាសជោគជ័យក្នុងកិច្ចការងាររបស់ខ្លួន។ តើមានវិធីអ្វីខ្លះ?

នៅពេលដែលអ្នកទទួលបានការងារណាមួយ អ្នកប្រាកដជាចង់ធ្វើនូវរឿងគ្រប់យ៉ាងតាមលទ្ធភាព ដើម្បីទទួលបានជោគជ័យក្នុងកន្លែងការងារ។ ក្នុងខណៈពេលដែលមានកត្តាជាច្រើន ដែលអាចនាំមកនូវផលប៉ះពាល់ មិនថាអ្នកនឹង ឬមិនអាចទទួលបានជោគជ័យ យ៉ាងណាក៏ដោយ អ្នកគួរតែបង្កើតឱកាស ដើម្បីទទួលបានលទ្ធផលនេះ តាមរយៈជំហានជាមូលដ្ឋានដូចខាងក្រោម៖

១. ធ្វើការងាររបស់អ្នក

ដើម្បីធានាថា អ្នកបានធ្វើការងារដែលជាទំនួលខុសត្រូវរបស់អ្នក ត្រូវធ្វើឲ្យបា្រកដថា អ្នកទទួលបានបរិយាយការងារ (Job Description) ច្បាស់លាស់ ហើយស្វែងរកវិធីដែលធ្វើវាដោយងាយសម្រាប់ការងារដែលជាទំនួលខុសត្រូវរបស់អ្នក។

២. ធ្វើតាមគោលការណ៍

នៅពេលដែលឈានជើងចូលដល់ទីតាំង ឬកន្លែងការងារក្នុងទំនួលខុសត្រូវរបស់អ្នកហើយ ត្រូវប្រាកដថា អ្នកបានអាន និងសិក្សាស្វែងយល់ពីគោលការណ៍ និងបទបញ្ជាផ្ទៃក្នុងរបស់ក្រុមហ៊ុនច្បាស់លាស់។

៣. ត្រូវមានភាពក្លាហាន

ត្រូវរៀបចំអត្តចរិតលក្ខណៈប្រកបដោយភាពជឿជាក់ រួសរាយ រាក់ទាក់ ក្នុងការបង្កើតទំនាក់ទំនងជាមួយប្រធាន ក្រុមការងារ និងអតិថិជន។ ត្រូវមានភាពក្លាហាន ហើយត្រូវយល់ច្បាស់ថា អ្នកបានត្រៀមខ្លួនក្នុងការធ្វើការងារ មិនមែនបង្ហាញម៉ូដឡើយ។ ការចេះលែងសើច ជាទូទៅត្រូវបានការកោតសរសើរពីសមាជិកក្រុម តែត្រូវតែរក្សាអត្តចរិតលក្ខណៈថ្លៃថ្នូរ។

៤. ត្រូវធ្វើខ្លួនសកម្មក្នុងក្រុម

នៅក្នុងបរិយាកាសនៃក្រុមកាងារ ត្រូវតែជាអ្នកដែលសកម្មក្នុងការស្តាប់ ពីព្រោះថាពួកគេនឹងយល់ថាអ្នកជាបុគ្គលដែលបានផ្តល់គុណតម្លៃចំពោះគំនិតរបស់ពួកគេ។ ទោះជាយ៉ាងណាក៏ដោយ កុំស្ទាក់ស្ទើរក្នុងការចែករំលែក ពីចំណេះដឹង បទពិសោធន៍ និងបំណងប្រាថ្នា ដែលវាក៏អាចជាការចង់បានរបស់ចៅហ្វាយ ឬសមាជិកក្រុមផងដែរ។ ត្រូវចងចាំថា ម្ចាស់ក្រុមហ៊ុន ប្រធាន និងសមាជិកក្រុមតែងចង់បានបុគ្គលិក ដែលមានគំនិតផ្តួចផ្តើម ធ្វើតាមការណែនាំ ទទួលការរិះគន់ និងសហការបានល្អជាមួយក្រុមហ៊ុន ក៏ដូចជាក្រុមការងារ។

៥. ស្វែងរកបុគ្គលប្រឹក្សា

អ្នកអាចជ្រើសរើសបុគ្គលដែលមានបទពិសោធន៍ណាម្នាក់ ដែលអាចជួយប្រឹក្សាយោបល់ ក្នុងពេលដែល ឬដើម្បីបង្កើនចំណេះអាជីពរបស់អ្នក ទៅកាន់ភាពជោគជ័យ។ ដើម្បីស្វែងរកអ្នកដែលអាចប្រឹក្សាយោបល់ដល់អ្នកបាន ដំបូង ត្រូវកំណត់ចំណុចខ្សោយរបស់ខ្លួន រួចកំណត់នរណាដែលមានចំនុចខ្លាំងនៅលើលក្ខណ្ឌនោះ ហើយក៏ជាបុគ្គលដែលមានបទពិសោធន៍ខ្ពស់ផងដែរ។