បណ្តាញព័ត៌មានរុស្ស៊ី​ Rossiya 24 បានផ្សាយថា យន្តហោះយោធាមួយគ្រឿង បានហោះហើរចេញពីអាកាសយានដ្ឋានអន្តរជាតិនៅទីក្រុងមូស្គូ នាព្រឹក ថ្ងៃទី​១ខែមេសា ដោយបានដឹកសម្ភារ បរិក្ខារពេទ្យទៅជួយដល់អាមេរិក ក្នុងសង្គ្រាមប្រឆាំង​នឹង​កូវីដ-១៩។

សារព័ត៌មានរ៉យទ័របានផ្សាយថា ជំនួយខាងលើ​ កើតឡើង ក្រោយជំនួបពិភាក្សាតាមទូរស័ព្ទ រវាងប្រធានាធិបតីរុស្ស៊ី ពូទីន និងប្រធានាធិបតីអាមេរិក ដូណាល់ ត្រាំ កាលពីដើមសប្តាហ៍កន្លងមក ស្តីពីវិធីសាស្ត្រ​ទប់ស្កាត់​កូវីដ-១៩។

ជំនួយខាងលើរៀបចំឡើង ដោយក្រសួងការពារជាតិរុស្ស៊ី​ ប៉ុន្តែអ្នកនយោបាយរបស់អាមេរិកមួយចំនួនមិនពេញចិត្តនោះឡើយ ។ កន្លងមក អ្នកនយោបាយអាមេរិក បានស្នើឲ្យប្រធានាធិបតី ដូណាល់ ត្រាំ និង រក្សាគម្លាត់ពីប្រធានាធិបតី ពូទីន​។ ជំនួយខាងលើរបស់រុស្ស៊ី ត្រូវបានចាត់ទុកថា ជាការបង្កើនឥទ្ធិពលនយោបាយរបស់រុស្ស៊ី នៅលើឆាកអន្តរជាតិផងដែរ។

អ្នកនាំពាក្យរដ្ឋាភិបាលរុស្ស៊ី លោក Dmitry Peskov  បានបញ្ជាក់ថា ប្រធានាធិបតី ពូទីន ​សង្ឃឹមថា អាមេរិកនឹងជួយដល់រុស្ស៊ីវិញ ​ក្នុងពេលចាំបាច់ដែលរុស្ស៊ី ត្រូវការ។ បច្ចុប្បន្នរុស្ស៊ីមានអ្នកឆ្លងកូវីដ-១៩ កើនឡើងដល់ជាង​២៣០០នាក់ និងស្លាប់១៧ នាក់។ ចំណែកអាមេរិកវិញ មានអ្នកឆ្លងកើនឡើងដល់ទៅជាង ១៨៨ពាន់នាក់ ស្លាប់ជិត​៣៩០០នាក់ ៕​ ប្រែសម្រួលដោយ៖MEO