គ្រឹះស្ថានសិក្សាឯកជនធំៗ នៅទូទាំង​ប្រទេសកម្ពុជា កំពុង​បានចាប់ផ្តើមឈានទៅរកការបិទទ្វារជាបណ្តើរៗ បន្ទាប់ពីសាលាឯកជនតូចៗ និងមធ្យមរាប់ពាន់កន្លែង នៅទីក្រុងភ្នំពេញ បានផ្អាកដំណើរការ ឬត្រូវបិទទ្វារទាំងស្រុង ដោយសារតែវិបត្តិហិរញ្ញវវត្ថុ នាំ​ឲ្យ​ក្ស័យធន់ក្នុងអំឡុងពេលវិបត្តិកូវីដ ១៩។

ការដាក់ចេញនូវវិធានការគម្លាតសង្គម សម្រាប់ទប់ស្កាត់ការរាលដាលវីរុសកូវីដ១៩ របស់ក្រសួងអប់រំ យុវជន និងកីឡា ដែលតម្រូវមានការឲ្យ​បិទសាលារៀនទាំងរដ្ឋ និងឯកជន ហើយបង្វែរការអប់រំទាំងនោះមករៀនតាមប្រព័ន្ធអនឡាញនៅផ្ទះវិញ ជាហេតុធ្វើឲ្យសាលារៀនឯកជនជាច្រើនផ្អាកដំណើរការ។

បើតាមលោកវេជ្ជបណ្ឌិត គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី ជេ គួច អេឌ្យូខេសិន បានស្នើឲ្យ​អាណាព្យាបាលពិចារណាទៅលើកម្មវិធីសិក្សារបស់កូនតាមប្រព័ន្ធអនឡាញ និងជួយគាំទ្រទៅលើការបង់ថ្លៃសិក្សារបស់កូន ដើម្បីជួយសាលាអាចមានលំនឹង បន្តដំណើរ​ការ​របស់​ខ្លួន​ទៅ​មុខ​ទៀត។ លោកថា សព្វថ្ងៃនេះសាលាបានទទួលចំណូលពីការរៀនតាមប្រព័ន្ធអនឡាញមាន ១០-២០ ភាគរយប៉ុណ្ណោះ រីឯការចំណាយមានរហូតដល់ទៅ ៩០ភាគរយ។

វេជ្ជបណ្ឌិត​រូប​នេះ​ព្យាករ​ទៀត​ថា បើសិនជាក្រសួងនៅតែពន្យារពេលបិទសាលា ២-៣ ខែទៀត សាលាឯកជនធំៗនឹងត្រូវផ្អាកដំណើរការ ខណៈបច្ចុប្បន្នមានសាលាធំៗច្រើនជាងពាក់កណ្តាល ត្រូវបានបិទទ្វារឈប់ដំណើរការរួចទៅហើយ។

”បើសាលាឯកជនបិទហើយ ក្រោយចប់កូវីដ១៩ អត់មានសាលារៀន សូមកុំបន្ទោសខាងវិស័យឯកជន ហើយនៅពេលដែលសិស្សត្រឡប់ទៅសាលារដ្ឋវិញ គឺអត់មានសាលារៀនទេ គឺណែនអស់ហើយ ដូច្នេះទើបគេឱ្យសាលាឯកជនជាដៃគូសម្រាប់ការអភិវឌ្ឍ”។

លោក​បង្ហើប​ទៀត​ថា សាលាឯកជនភាគច្រើន បានបើកដំណើរការអាជីវកម្ម គឺរំពឹងទៅលើការកម្ចីប្រាក់ពីធនាគារជាទុនដ៏ធំ ហើយ​យ៉ាងហោចណាស់ សាលាឯកជនប្រភេទធំៗ អាចនឹងត្រូវការថវិកាខ្ចីពីធនាគារប្រមាណខ្ទង់ជាង ១០លានដុល្លារ ឯណោះ។

“ការបើកដំណើរការវិស័យឯកជន ជាគ្រឹះមួយសម្រាប់រួមចំណែក ជួយដល់រាជរដ្ឋាភិបាល ក្នុងការអភិវឌ្ឍដល់វិស័យអប់រំនៅកម្ពុជា។ ប៉ុន្តែបើគ្មានការរួមចំណែកពីវិស័យអប់រំឯកជនទេ ប្រព័ន្ធ​អប់រំនៅក្នុងប្រទេសកម្ពុជា គឺគ្មានការរីកចម្រើនឡើយ”។ នេះបើយោងតាមលោកវេជ្ជបណ្ឌិតគួច ម៉េងលី៕ ដោយ៖ ឃួន លក្ខិណា