TNAOT News
· 2020-07-20
អ្នកមានរំលោភយកដីចម្ការស្រល់ ជារឿងក្តៅនៅខេត្តមណ្ឌលគិរី
#ស្រុកអូររាំង# #ចំការស្រល់# #ដីរដ្ឋ# #សង្គម# #អចលនទ្រព្យ#
8820
ខេត្តមណ្ឌលគិរី៖ អាជ្ញាធរខេត្តមណ្ឌលគិរី បានចេញលិខិតបដិសេធលើលិខិតកាន់កាប់ដីធ្លី ដែលចេញដោយមេភូមិ មេឃុំ ចំនួន៤៧៣ហិចតា ក្នុងស្រុកអូររាំង ក្រោយរកឃើញថា ដីទាំងនោះ ជាប់ពាក់ព័ន្ធដីស្រល់កម្មសិទ្ធិរបស់រដ្ឋ និងដីក្រុមហ៊ុនដែលទទួលសិទ្ឋវិនិយោគពីរដ្ឋ។
សេចក្តីរាយការណ៍បានឲ្យដឹងថា ដីចំការស្រល់រដ្ឋ និងស្រល់របស់ក្រុមហ៊ុនរាប់រយហិចតា ត្រូវបានក្រុមឈ្មួញខិលខូច និងមន្ត្រីគ្រាក់ៗ ដែលចូលចិត្តរកស៊ីលួចបន្លំរបស់រដ្ឋ ប្រើយុទ្ធសាស្ត្រខ្ចីដៃប្រជាពលរដ្ឋ កាប់ឆ្ការដើមស្រល់រាប់ម៉ឺនដើមសម្អាតដី រួចឃុបឃិតជាមួយអាជ្ញាធរមូលរដ្ឋធ្វើលិខិតកាន់កាប់ ទុកលក់ឲ្យថៅកែៗឧកញ៉ាដែលសម្បូរលុយ សំបូរអំណាច ។ល។
សេចក្តីរាយការណ៍បន្តថា ក្រោយគម្រោងសាងសង់ព្រលានយន្តហោះនៅស្រុកអូររាំង ត្រូវបានប្រកាសជាសាធារណៈ និងព័ត៌មានពីជនជាតិចិន ចូលទៅរកស៊ីនៅទឹកដីខេត្តមណ្ឌលគិរី តម្លៃដីចាប់ផ្តើមឡើងថ្លៃកប់ពពក ហើយដីរដ្ឋដែលកាលកន្លងមកស្ទើរគ្មានអ្នកយកភ្នែកមើល ស្រាប់តែមានបង្គោលរបងហោះទៅហ៊ុំព័ទ្ឋដីទាំងនោះព្រោងព្រាតតែម្តង។
មិនត្រឹមតែដីរដ្ឋនោះទេ សូម្បីដីដែលព្រះមហាក្សត្រយាងដាំកូនឈើនាឆ្នាំ២០០៤ ក៏មានគេលួចយករបងទៅបោះដែរ តែត្រូវអាជ្ញាធរខេត្តចុះចាត់វិធានការភ្លាមៗ។ ជុំវិញករណីខាងលើនេះ កន្លងមកគេបានសង្កេតឃើញថា មន្ត្រីជំនាញក៏បានធ្វើប្រតិបត្តិការបង្ក្រាបនិងដកហូតដីទាំងនោះមកទុកជាសម្បត្តិរដ្ឋវិញជាច្រើនករណីផងដែរ ប៉ុន្តែអ្នកពាក់ព័ន្ឋហាក់មិនត្រូវបានបញ្ជូនសំនុំរឿងដល់ដៃស្ថាប័នតុលាការដើម្បីចាត់វិធានការតាមផ្លូវច្បាប់ឡើយ។
ដោយឡែកកាលពីអំឡុងខែមិថុនា ២០២០ ផ្ទះកុងតឺណ័រចំនួន៧ខ្នងត្រូវបានជំនាញរដ្ឋបាលព្រៃឈើ ចាប់រឹបអូសក្រោយមានអ្នកយកទៅសាងសង់ក្នុងព្រៃចំការស្រល់មួយកន្លែងក្នុងភូមិពូរាំង ឃុំសែនមនោរម្យ ស្រុកអូររាំង។ កន្លងមក ដីដែលគេបម្រុងសង់ផ្ទះកុងតឺណ័រនេះ ធ្លាប់ត្រូវបានអតីតអភិបាលស្រុកអូររាំង ដែលបច្ចុប្បន្នគាត់ គឺជាប្រធានក្រុមប្រឹក្សាស្រុកអូររាំងលោក នង ទុណ្ណារី ជាអ្នកអះអាងថា ដីស្របច្បាប់ម្ចាស់ដីមានលិខិតស្នាមកាន់កាប់ត្រឹមត្រូវទើបគាត់ស៊ីញ៉េបោះត្រាលើការផ្ទេរលក់ដីនោះប្រមាណ៥០ហិចតាឯណោះ។តែបច្ចុប្បន្នលោក នង ទុណ្ណារី កំពុងផុងខ្លួនក្នុងសំនុំរឿងដីធ្លីនៅតុលាការ ដែលក្នុងពេលលោកនៅជាអភិបាលស្រុកស៊ីញ៉េលក់ជាច្រើនកន្លែង។ ផ្តល់សិទ្ធិដោយ៖ កោះសន្តិភាព
សេចក្តីថ្លែងការណ៍លើកលែង
អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។
ស្នាដៃពេញនិយមរបស់គាត់
ការណែនាំពិសេស
ក្រុមអ្នកមុជទឹក ប្រមូលសំរាមចំនួន ២ តោន នៅតំបន់ផ្កាថ្មលើកោះ Con Dao ក្នុងប្រទេសវៀតណាម
កាលពីថ្ងៃទី ១១ ខែកុម្ភៈ ក្រុមកីឡារបស់ចិនដណ្តើមបានមេដាយមាស ៦ ប្រាក់ ៥ និងសំរឹទ្ធ ៥ ចំនួនមេដាយសរុបឡើងដល់ ៧០ បងើ្កតកំណត់ត្រាថ្មីក្នុងប្រវត្តិសាស្ត្រព្រឹត្តិការណ៍កីឡាអាស៊ីរដូវរងា
ស្ថានឯកអគ្គរាជទូតកម្ពុជាប្រចាំប្រទេសជប៉ុន រៀបចំពិធីអបអរសាទរពិធីបុណ្យចូលឆ្នាំខ្មែរក្នុងបរិយាកាសរីករាយ និងស្និទ្ធស្នាល
ពេលចាស់ទៅ ចំណុចទាំង៤នេះនឹងជួយឱ្យអ្នកមានជីវិតពោរពេញដោយក្តីសុខ
យោបល់ទាំងអស់ (0)