កាលពីថ្ងៃពុធរដ្ឋាភិបាលថៃបានរាយការណ៍ថា ប្រទេសថៃមាន​ករណីថ្មីនៃ​អ្នកឆ្លងមេរោគកូវីដ១៩ ​ចំនួន ៧នាក់ ​ដែលមាន​ ៦នាក់ មកពីប្រទេសមជ្ឈិមបូព៌ា និងម្នាក់ទៀតមកពីសហរដ្ឋអាមេរិក ​បានធ្វើឱ្យចំនួនអ្នកឆ្លងសរុបកើនឡើងដល់ ៣ ៣២៨នាក់។

លោក Panprapa Yongtrakul ជំនួយការអ្នកនាំពាក្យមជ្ឈមណ្ឌល​រដ្ឋបាលស្ថានភាពមេរោគកូវីដ១៩ បានមានប្រសាសន៍ថា អ្នកជំងឹថ្មីទី១ ជា​ស្រ្តីម៉ាស្សា​ជនជាតិថៃ​ម្នាក់មានអាយុ ៣៤ឆ្នាំ ​​បានត្រឡប់មកពីប្រទេសអារ៉ាប់រួមកាលពីថ្ងៃទី២៩ ខែកក្កដា ហើយត្រូវបានគេដាក់នៅដាច់ដោយឡែក​ក្នុងខេត្ត​ Chon Buri។ ​ ​អ្នកជំងឺចំនួន​ ៥នាក់ឯទៀតជាជនជាតិថៃត្រឡប់មកពីប្រទេសអេ​ស៊ីប។ ​ពួកគេជានិស្សិតថៃដែលមានអាយុ ២១​,​ ២២, ២៣, ២៦ និង ៣០ឆ្នាំ ។ ​អ្នកជំងឹថ្មីទី៧ ​គឺជាស្ត្រីជនជាតិអាមេរិកាំង ​ជាគ្រូបង្រៀនមា្នក់មានអាយុ ២៦ឆ្នាំ ​បានមកដល់ក្រុងបាងកក​កាលពីថ្ងៃទី ៣១ ខែកក្កដា ​និងត្រូវ​បញ្ជូនទៅ​មជ្ឈមណ្ឌលដាច់ដោយឡែកក្នុងទីក្រុងបាងក​ក។

វេជ្ជបណ្ឌិត Panprapa បាន​មានប្រសាសន៍ថា រហូតមកដល់ពេលនេះមាន​ជនជាតិថៃចំនួន ១ ៣៦០នាក់​ បានត្រឡប់មកពី​ប្រទេសអេហ្ស៊ីប ហើយក្នុងចំណោមពួកគេមាន ១១.៥១​% ​បានឆ្លងជំងឺកូវីដ១៩។ ជនជាតិថៃមកពីប្រទេសអារ៉ាប់រួមមានចំនួនសរុប ១ ៥០៨នាក់ ​​និងមានអត្រាឆ្លងជំងឺចំនួន ៧.១៦%។  ​ជនជាតិថៃមកពីសហរដ្ឋអាមេរិកសរុបចំនួន​ ៤ ៧៣៩នាក់ ​​ហើយមានអត្រាឆ្លង​ជំងឺចំនួន ៨.៩៥% ។  

ក្នុងចំណោម​អ្នកឆ្លងមេរោគកូវីដ១៩សរុបនៅទូទាំងប្រទេសថៃ​ចំនួន ៣ ៣២៨នាក់ មាន ៣ ១៤៤នាក់​ ដែលបានជាសះស្បើយ និងបន្សល់ទុកអ្នកជំងឹចំនួន ១២៦នាក់ ទៀតកំពុងបន្តសម្រាកព្យាបាលនៅមន្ទីរពេទ្យនៅឡើយ។ ចំនួនអ្នកស្លាប់នៅ​រក្សាចំនួន ៥៨នាក់ដដែល។ ​​

គិតមកដល់ពេលនេះ ចំនួនអ្នកឆ្លងមេរោគកូវីដ១៩ទូទាំងពិភពលោក​​កើនឡើង​ដល់ ១៨.៧០ លាននាក់ និងមាន​អ្នកស្លាប់សរុប​​ចំនួន ៧០៤ ៣៦៥នាក់។ សហរដ្ឋអាមេរិកមាន​អ្នកឆ្លងច្រើនជាងគេគឺ ៤.៩២លាននាក់ ​និងមានអ្នកស្លាប់ច្រើនបំផុតគឺ ១៦០ ២៩០នាក់។ ប្រទេសប្រេស៊ីលជាប់ចំណាត់ថ្នាក់ទី២ ដែលមាន​អ្នកឆ្លងសរុបចំនួន ២.៨១លាននា​ក់ ​និងមាន​អ្នកស្លាប់​សរុបចំនួន ៩៦ ០៩៦នាក់។ ប្រទេសឥណ្ឌាជាប់ចំណាត់ថ្នាក់ទី៣ ដែលមានអ្នកឆ្លងសរុបចំនួន ១.៩១លាននាក់ ​និងមានអ្នកស្លាប់សរុបចំនួន ៣៩ ៨២០នាក់​៕

កែសម្រួលដោយ៖ ភារ៉ា

ប្រភព៖ Bangkok Post