អតីតប្រធានាធិបតីហ្វីលីពីន លោក Rodrigo Duterte បាននិយាយថា លោកបានត្រៀមខ្លួនរួចជាស្រេចដើម្បីទទួលយកការទទួលខុសត្រូវ ខណៈដែលតុលាការឧក្រិដ្ឋកម្មអន្តរជាតិបាននាំគាត់ទៅឃុំឃាំងកាលពីថ្ងៃពុធ ជុំវិញករណីសង្គ្រាមលើការបង្រ្កាបគ្រឿងញៀនរបស់លោក។

ICC ដែលមានមូលដ្ឋាននៅទីក្រុងឡាអេ ជឿថាមានហេតុផលសមស្រប ដើម្បីចោទប្រកាន់លោក Duterte ពីបទឃាតកម្មជាឧក្រិដ្ឋកម្មប្រឆាំងមនុស្សជាតិ ក្នុងនាមជាសហឧក្រិដ្ឋជនដោយប្រយោល ក្នុងអំឡុងពេលយុទ្ធនាការប្រឆាំងគ្រឿងញៀន ដែលក្រុមសិទ្ធិមនុស្សប៉ាន់ស្មានថាបានសម្លាប់មនុស្សរាប់ពាន់នាក់។ លោក Duterte បាននិយាយនៅក្នុងវីដេអូដែលបង្ហោះលើទំព័រហ្វេសប៊ុករបស់គាត់ និងទីប្រឹក្សាជិតស្និទ្ធរបស់គាត់ថា ខ្ញុំជាអ្នកដែលដឹកនាំការអនុវត្តច្បាប់ និងយោធារបស់យើង។ ខ្ញុំបាននិយាយថា ខ្ញុំនឹងការពារអ្នក ហើយខ្ញុំនឹងទទួលខុសត្រូវចំពោះរឿងទាំងអស់នេះ ។

អតីតប្រមុខរដ្ឋអាស៊ីដំបូងគេដែលបង្ហាញខ្លួននៅមុខ ICC លោក Duterte ក្នុងវ័យ ៧៩ បាននិយាយទៅកាន់ប៉ូលិសយោធាថា វាជាការងាររបស់ខ្ញុំ ហើយខ្ញុំទទួលខុសត្រូវ។ អ្នកនាំពាក្យម្នាក់បានបញ្ជាក់ថា លោក Duterte កំពុងស្ថិតក្នុងការឃុំឃាំងរបស់តុលាការ បន្ទាប់ពីលោកបានមកដល់ទីក្រុង Rotterdam តាមយន្តហោះឯកជន។ យានជំនិះដែលគេគិតថាដឹកលោក Duterte បានបើកចូលទៅក្នុងមជ្ឈមណ្ឌលឃុំឃាំង ICC នៅទីក្រុងឡាអេ ឆ្លងកាត់ហ្វូងអ្នកគាំទ្ររាប់សិបនាក់ ដោយខ្លះស្រែកថានាំគាត់មកវិញ និងគ្រវីទង់ជាតិ៕