យោងតាមរបាយការណ៍ប្រព័ន្ធផ្សព្វផ្សាយ នៅថ្ងៃទី ៤ ខែមីនានេះសមាជិក CNBLUE ពីរនាក់គឺលោក Jungshin និង លោក Minhyuk ត្រូវបានរំសាយពីកាតព្វកិច្ចជាយោធារបស់ពួកគេមុនពេលកំណត់ ដោយសារតែការរីករាលដាលវីរុស Corona ( COVID-19) នាពេលបច្ចុប្បន្ននេះ។

ទាំង Jungshin និង Minhyuk ត្រូវបានគេគ្រោងទុកថានឹងបញ្ចប់កាតព្វកិច្ចជាយោធារបស់ពួកគេនៅថ្ងៃទី ១៩ ខែមីនា ខាងមុខ។ ប៉ុន្តែនៅថ្ងៃទី ២២ ខែកុម្ភៈ រដ្ឋបាលយោធាកម្លាំងពលកម្ម បានសម្រេចចិត្តចាត់វិធានការបង្ការប្រឆាំងនឹងការរីករាលដាលនៃមេរោគ Coronavirus នៅក្នុងមូលដ្ឋានយោធា ដោយបានរំសាយពីកាតព្វកិច្ចជាយោធារបស់ពួកគេមុនពេលកំណត់ ។

ដោយសារ Jungshin និង Minhyuk ត្រឡប់មកវិញ សមាជិកទាំងអស់នៃ CNBLUE ឥឡូវនេះបានបំពេញកាតព្វកិច្ចជាយោធារបស់ពួកគេដោយជោគជ័យហើយ។ គួរបញ្ជាក់ផងដែរថាសមាជិកដែលជារៀមច្បងគេប្រចាំក្រុមគឺ Yonghwa ក៏បានវិលត្រឡប់ពីការបំពេញភារកិច្ចរបស់គាត់វិញកាលពីខែវិច្ឆិកាឆ្នាំមុន ហើយបច្ចុប្បន្នកំពុងត្រៀមសម្រាប់ការផ្សព្វផ្សាយតាមកម្មវិធីផ្សេងៗ ក៏ដូចជាការប្រគំតន្ត្រីផងដែរ ៕

ដោយ : ធារ៉ា

ប្រភព :  allkpop