ពាក្យថា ប៉ា មានន័យធំធេងខ្លាំងណាស់សម្រាប់កូនគ្រប់រូប រូបលោកបានលះបង់ទាំងកម្លាំងកាយ កម្លាំងចិត្ត ពេលវេលាដ៏មានតម្លៃនៅក្នុងជីវិតរបស់គាត់ទៅអោយគ្រួសារមួយដែលគាត់បានបង្កើតវាឡើង។

ទោះគាត់មានភាពនឿយហត់លំបាកវេទនាយ៉ាងណាកដោយ ក៏គាត់នៅតែខំប្រឹងតស៊ូ ដើម្បីអោយគ្រួសាររបស់គាត់មានសុភមង្គល សេចក្តីសុខ មិនចង់អោយគ្រួសារជួបភាពលំបាកវេទនានោះទេ នេះហើយគឺជាប៉ា។

ក៏ប៉ុន្តែការខិតខំរបស់គាត់ក៏មិនអាចបានលទ្ធផលល្អទាំងអស់នោះទេ ពេលខ្លះក៏ជោគជ័យ ហើយពេលខ្លះទៀតក៏បរាជ័យ តែលោកមិនដែលបោះបង់នោះទេ គឺដោយសារតែប្រពន្ធនិងកូន។

កាលកូននៅតូចទោះបីជាមានភាពនឿយហត់យ៉ាងណាក៏លោកនៅតែញញឹមមករកកូន ថ្នាក់ថ្នម ប្រលែងបីលេងកម្សាន្តដើម្បីឃើញកូនសើចសប្បាយរីករាយ គាត់ក៏បាត់បង់ភាពនឿយហត់ទៅតាមហ្នឹងដែរ។

តែកូនមួយចំនួនមិនបានដឹងគុណនៅអ្វីដែលលោកបានធ្វើនោះទេ ថែមទាំងធ្វើអោយការខំប្រឹងរបស់លោកក្លាយទៅជាទឹកភ្នែកទៅវិញ។ អ្នកទាំងអស់គ្នាប្រាកដជាដឹងហើយលោកមិនដែលចង់បានអ្វីក្រៅពីចង់ឃើញកូនមានសេចក្តីសុខ ចង់ឃើញកូនមានភាពជោគជ័យនៅក្នុងជីវិតនោះទេ។ ដូច្នេះហើយយើងគួរតែធ្វើអ្វីដែលល្អៗ ដើម្បីគ្រួសារនិងសង្គមរស់នៅរបស់យើងនេះហើយជាអ្វីដែលគាត់ចង់បានពីកូន។ អត្ថបទដោយ÷ បូរ៉ា