សេអ៊ូល៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៩ ខែមិថុនា ឆ្នាំ២០២២ថា ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យនេះថា ប្រទេសកូរ៉េខាងជើង បានបញ្ជូនក្រុមគ្រូពេទ្យ និងអ្នកស៊ើបអង្កេតរោគរាតត្បាតទៅកាន់ខេត្តមួយដើម្បីប្រយុទ្ធប្រឆាំងនឹងការផ្ទុះឡើងនៃជំងឺក្រពះពោះវៀន ។

យ៉ាងហោចណាស់៨០០គ្រួសារដែលរងគ្រោះពីអ្វីដែលកូរ៉េខាងជើងទើបតែហៅថា “ជំងឺរាតត្បាតធ្ងន់ធ្ងរ” បានទទួលជំនួយនៅក្នុងខេត្ត South Hwanghae រហូតមកដល់ពេលនេះ ។

ជំងឺ Enteric សំដៅលើក្រពះពោះវៀន ហើយមន្ត្រីកូរ៉េខាងត្បូង លើកឡើងថា វាអាចជាជំងឺអាសន្នរោគ ឬគ្រុនពោះវៀន ។

ការរាតត្បាតថ្មីដែលត្រូវបានរាយការណ៍ជាលើកដំបូងកាលពីថ្ងៃព្រហស្បតិ៍ បានដាក់ភាពតានតឹងបន្ថែមទៀតលើប្រទេសឯកោមួយនេះ ខណៈដែលប្រទេសនេះប្រយុទ្ធប្រឆាំងនឹងការខ្វះខាតអាហាររ៉ាំរ៉ៃ និងរលកនៃការឆ្លងជំងឺកូវីដ-១៩ ៕