អាជ្ញាធរនិងមន្ត្រីមន្ទីរធនធានទឹកនិងឧតុនិយមបានចុះត្រួតពិនិត្យទំនប់ធារាសាស្រ្តដំណាក់អំពិល ដើម្បីជួយអន្តរាគមន៍សង្គ្រោះស្រូវប្រាំងប្រជាកសិករ ដែលកំពុងជួបប្រទះបញ្ហាខ្វះទឹកសង្គ្រោះស្រូវប្រាំង។

បើតាមលោក ខូយ រីដា អភិបាលខេត្តពោធិ៍សាត់ កាលពីថ្ងៃទី១២ ខែមករា ឆ្នាំ២០២៣ បានឱ្យដឹងថា អាជ្ញាធរសម្រេចបើកទ្វាទឹកតាមប្រព័ន្ធមេកានិច្ច នៅទំនប់ធារាសាស្ត្រដំណាក់អំពិល ដើម្បីជួយអន្ត​រាគមន៍សង្គ្រោះស្រូវប្រាំងប្រជាកសិករ ក្នុងស្រុកបាកាន ក្រុងពោធិ៍សាត់ និងស្រុកកណ្តៀង នៃខេត្តពោធិ៍សាត់។

លោកបញ្ជាក់ថា៖«មកដល់ពេលនេះ ស្រូវកំពុងជួបបញ្ហាខ្វះខាតទឹក ខណៈដែលប្រជាពលរដ្ឋបានរាយការណ៍និងស្នើសុំអន្តរា​គម​ន៍»។

បើតាមលោក ហៃ ធូរ៉ា ប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តពោធិ៍សាត់ បានឱ្យដឹងថា នៅទូទាំងស្រុកបាកាន ផ្ទៃដីអនុវត្តបាន ២៤,១២៦ហិកតា​ នៃផែនការ​ ១០,៨០០ហិកតា, ក្រុងពោធិ៍​សាត់ ផ្ទៃដីអនុវត្តបាន ២,១៤១ហិកតា​ នៃផែនការ​ ១,៩០​០ហិកតា និងស្រុកកណ្តៀង ផ្ទៃដីអនុវត្តបាន ៦,៤៩៣ហិកតា​ នៃផែនការ​ ៣,៦០០ហិក៕ ចិនចាវ