ក្រសួងមហាផ្ទៃ កាលពីថ្ងៃទី១៩ ខែមករា ឆ្នាំ២០២៣នេះ បានបើកកិច្ចប្រជុំអន្ដរក្រសួង បន្តត្រួតពិនិត្យនិងពិភាក្សាលើសេចក្តីព្រាងព្រះរាជក្រឹត្យស្តីពីគោរពមងារឧកញ៉ា ដើម្បីពន្លឿនឱ្យឆាប់ចប់ ដាក់ជូនទៅអង្គភាពពាក់ព័ន្ធពិនិត្យបន្ត។​ នេះបើយោងតាមទំព័រផ្លូវការរបស់ក្រសួងមហាផ្ទៃ។

ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមការងារអន្តរក្រសួងបានឱ្យដឹងថា ក្រសួងមហាផ្ទៃ បានបើកកិច្ចប្រជុំពិនិត្យ និងពិភាក្សា ​លើសេចក្ដីព្រាងព្រះរាជក្រឹត្យស្ដីពីគោរ​មងារឧកញ៉ានេះ។

ឯកឧត្តមមានប្រសាសន៍ថា កន្លងមកបានបើកកិច្ចប្រជុំពិនិត្យ និងភាក្សាជាច្រើនលើករួចមកហើយ ប៉ុន្តែ នៅថ្ងៃនេះដែរ អង្គ​ប្រជុំនឹងបន្តពិនិត្យពិភាក្សាទៅលើឯកសណ្ឋាន សញ្ញាស័ក្តិ មេដាយ បន្តោងខ្សែក និងខ្សែក្រវ៉ាត់សម្រាប់គោរមងារផ្លូវការរបស់អ្នកឧកញ្ញ៉ានៃព្រះរាជាណាចក្រកម្ពុជា។

សូមជម្រាបជូនថា ព្រះរាជក្រឹត្យ ស្ដីពីគោរមងារឧកញ៉ា ដែលកំពុងដំណើរការពិនិត្យពិភាក្សានេះ មាន ១០ជំពូក និង ២៦មាត្រា ហើយព្រះរាជក្រឹត្យនេះ មានវិសាលភាពអនុវត្តចំពោះរូបវន្ដបុគ្គលជាប្រជាពលរដ្ឋខ្មែរ ដែលទទួលបានគោរមងារឧកឧញ៉ា នៅព្រះ​រាជាណាចក្រកម្ពុជា៕ ចិនចាវ