រថយន្ត Hyundai H1 ឬ Hyundai Starex ជំនាន់ទី 3 នេះទិញជំនុំៗបើចេះមើលល្អក្នុងការប្រើប្រាស់តម្លៃធូរស័ក្តសមសម្រាប់បរិបទគ្រួសារហើយចំណេញបំផុតសម្រាប់ការប្រកបអាជីវកម្ម។

កាន់លុយមួយម៉ឺនស្ដើងទិញបាន។ បងប្អូនដែលគិតគូរខ្លាំងពីបញ្ហាសេដ្ឋកិច្ច មិនគួរមើលរំលងរថយន្តនេះឡើយ។

រថយន្ត Hyundai H1 ឬក៏ Hyundia Starex គឺជារថយន្តដែលមានឈ្មោះបោះសម្លេងមួយដែលមានភាពពេញនិយមប្រើប្រាស់ច្រើននៅក្នុងប្រទេសកម្ពុជាយើងឱ្យតែលឺឈ្មោះ នរណាក៏ស្គាល់វាគឺជារថយន្តប្រភេទ Van ឬក៏ MPV មួយម៉ូដែលរបស់ក្រុមហ៊ុន Hyundai ដែលមកទល់ពេលបច្ចុប្បន្ននេះបានវិវត្តខ្លួនទៅជា Hyundai Staria បាត់ទៅហើយ។

សូមនាំអារម្មណ៍បងប្អូនងាកមកផ្ដោតសំខាន់ទៅលើរថយន្ត Van ដ៏ពេញនិយម នៅក្នុងព្រះរាជាណាចក្រកម្ពុជានេះម្ដង។ ព្រោះវាមាននូវគុណសម្បត្តិជាច្រើនដែលអាចចំណេញច្រើនសម្រាប់បងប្អូនដែលជាអ្នកប្រើប្រាស់ទូទៅ ម្ចាស់អាជីវកម្មនិងអ្នកប្រកបរបស់រកសុី។

ចង់ដឹងថាវាចំណេញអ្វីខ្លះទើបពួកយើងហ៊ានសន្និដ្ឋានបែបនេះ?

ជាការពិតណាស់ស្ថិតក្នុងជំនាន់ទី 3 នេះរថយន្ត Hyundia Starex ឬក៏ Hyundia H1 ទទួលបាននូវការអភិវឌ្ឍន៍ទៅលើរូបរាងកាន់តែប្រសើរ ដែលបានផ្ដល់នូវ ៖

- ភាពទាក់ទាញ

- ទំហំធំទូលាយ

+ ទទឹងប្រវែង ៖ 1920 មីលីម៉ែត្រ

+ បណ្ដោយប្រវែង ៖ 5125 មីលីម៉ែត្រ

+ គម្លាតកង់ប្រវែង ៖ 3200 មីលីម៉ែត្រ

+ កម្ពស់ប្រវែង ៖ 1925 មីលីម៉ែត្រ

+ ទម្ងន់ចន្លោះពី 1832 - 2620 គីឡូក្រាម

1 បើនិយាយអំពីការរចនាផ្នែកខាងក្រៅវិញ Hyundia H1 ជំនាន់ទី 3 នេះអាចចាត់ទុកថាគឺជារថយន្ត MPV ដែលចូលចំណោមគេចុះ។

ដូច្នេះហើយវាក៏អាចជាកត្តាមួយសម្រាប់បងប្អូនដែលកំពុងតែកាន់លុយរារែកចិត្តគួរតែសម្រេចចិត្តចាយទៅលើរថយន្តនេះដែរ។

2 ជម្រើសម៉ាស៊ីន ៖

រថយន្តដែលល្អមិនមែនសម្ដៅលើតែសម្បកក្រៅនោះទេ។

ជាក់ស្ដែងរថយន្ត Hyundia H1 ឬ Hyundai Starex ជំនាន់ទី 3 នេះមាននូវជម្រើសម៉ាស៊ីនជាច្រើនដូចជា ៖

- Petrol:

- 2.4 L Theta II MPi I4

- Petrol/LPG:

- 2.4 L Theta LPi I4

- Diesel:

- 2.5 L D4BH TCi I4

- 2.5 L A II CRDI VGT I4[6]

- 2.5 L A II CRDI WGT I4

បងប្អូនប្រជាពលរដ្ឋកម្ពុជាយើងនិយមប្រើជម្រើសម៉ាស៊ីនម៉ាស៊ូតដែលវាជាកត្តាដែលនាំមកនូវភាពសន្សំសំចៃមួយល្អសម្រាប់សេដ្ឋកិច្ចរបស់អ្នកប្រើប្រាស់ 

ប្រអប់លេខមានជាជម្រើស ៖

- 5 វគ្គលេខដៃ

- 6 វគ្គលេខដៃ

- 4 វគ្គលេខអូតូម៉ាតិច

- 5 វគ្គលេខអូតូម៉ាតិច

កម្រិតស៊ីប្រេងឥន្ធនៈជាមធ្យមរបស់វាគឺអាស្រ័យទៅតាមឆ្នាំផលិតជម្រើសម៉ាស៊ីនប្រអប់លេខនិងគុណភាពនៃរថយន្ត។ ប៉ុន្ដែបើតាមបទពិសោធន៍ជាក់ស្ដែងដូចដែលអេដមីនធ្លាប់បានដឹងពីមុនមកពីបងប្អូនអ្នកប្រើប្រាស់ផ្ទាល់គឺ 100 គីឡូម៉ែត្រចាយប្រហែលចន្លោះពី 7 - 9 លីត្រជាមធ្យមដែលគេអាចចាត់ទុកថាជាភាពសន្សំសំចៃមួយនៅក្នុងការប្រើប្រាស់។

3 ក្រៅពីរូបរាងផ្នែកខាងក្រៅក៏ដូចជាជម្រើសម៉ាស៊ីនផ្នែកខាងក្នុងក៏ជាចំណុចក្ដៅមួយដែរ។

តួរយ៉ាងរថយន្ត Hyundai Starex ឬក៏ H1 ជំនាន់ទី 3 នេះបានផ្ដល់នូវទំហំធំទូលាយទាំងទទឹងនិងកម្ពស់ដែលនាំឱ្យវាក្លាយជាជម្រើសល្អមួយសម្រាប់គ្រួសារដែលមានសមាជិកច្រើនក៏ដូចជាបងប្អូនដែលប្រកបអាជីវកម្មមិនតែប៉ុណ្ណោះការរចនាផ្នែកខាងក្នុងក៏មានរបៀបរៀបរយមិនសាំភ្នែកទទួលយកបានសម្រាប់អ្នកប្រើប្រាស់ទូទៅដោយមិនរើសអើងស្រទាប់វណ្ណៈ។

បច្ចុប្បន្ននេះបើទិញប្រភេទជំនុំៗបងប្អូនអាចកាន់លុយបានត្រឹម 1 ម៉ឺនដុល្លាជាងប៉ុណ្ណោះ។ បញ្ជាក់សម្រាប់ម៉ូដែលឆ្នាំផលិត 2008 - 2010 ប្រភេទមួយទឹក។ តែបើចង់បានឆ្នាំផលិតខ្ពស់ ជាងនេះអាចនឹងមានតម្លៃខ្ពស់បន្ដិច។ តែយល់ល្អយកឆ្នាំទាបៗល្មមៗទៅបើបងប្អូនចង់ចំណេញថវិកាច្រើនព្រោះរូបរាងដូចតែគ្នា។

សម្រាប់អេដមីនយល់ឃើញថាវាគឺជាតម្លៃមួយដ៏សមរម្យសម្រាប់រថយន្ត MPV នេះព្រោះវាអាចផ្ដល់ឱ្យអ្នកប្រើប្រាស់នូវគុណសម្បត្តិច្រើន។