ការ​ប្រឡង​សញ្ញាបត្រ​មធ្យមសិក្សា​ទុតិយភូមិ​រយៈពេល​ពីរ​ថ្ងៃ ​របស់​សិស្ស​វិទ្យាល័យ​ថ្នាក់​ទី​១២​ ឆ្នាំ២០២៤នេះនឹង​ចាប់ផ្ដើម​ទៅនៅ​ថ្ងៃ​ទី​៨ ខែតុលា​ ខាងមុខនៅ​ទូ​ទាំង​ប្រទេស​។ ខណៈសល់ពេលមិនដល់ប្រមាណមួយខែទៀតនេះ អតីតសិស្សនិទ្ទេសA ឆ្នាំសិក្សា២០២៣ ស៊ាន វិសាល ក៏បានចូលរួមចែករំលែកបទពិសោធន៍ និងគន្លឹះផ្សេងៗដើម្បីទទួលបាននិទ្ទេសល្អពីការប្រឡង​ខាងមុខនេះ។

ដោយក្នុងនោះ និស្សិត ស៊ាន វិសាល បានលើកឡើងថា ដើម្បីទទួលបាននិទ្ទេសល្អក្នុងការប្រឡងសញ្ញាបត្រធម្យមសិក្សាទុតិយភូមិ ត្រូវស្វែងយល់ពីមុខវិជ្ជាដែលត្រូវប្រឡង សិស្សត្រូវតែដាក់វិន័យមកលើខ្លួនឯងយកចិត្តទុកដាក់​ស្តាប់គ្រូបង្រៀន ហើយជាពិសេសនោះគឺការស្វ័យសិក្សា ដែលជាកត្តាដែលនាំយើងឈានទៅរកភាពជោគជ័យលឿន និងពង្រឹងចំណុចខ្វះខាតដែលមាន។

បន្ថែមពីនេះ និស្សិត ស៊ាន វិសាល ក៏បានលើកឡើង ៥ចំណុច ដែលសិស្សគួរអនុវត្ត នៅប្រមាណជិតមួយខែទៀតដល់ថ្ងៃប្រឡង​សញ្ញាបត្រ​មធ្យមសិក្សា​ទុតិយភូមិនេះមានដូចជា៖ ចំណុចទី១. សិស្សគួរតែព្យាយាមរំលឹកមេរៀនទាំងអស់ដែលធ្លាប់បានសិក្សាហើយ, ចំណុចទី២. ការរៀបចំប្រឡងសាកល្បងសមត្ថភាព​ ពីព្រោះការសាកល្បងប្រឡងនេះនឹងជួយឲ្យសិស្សអាចយល់កាន់តែច្បាស់ពីសមត្ថភាព និងពេលវេលា, ចំណុចទី៣ បន្តអនុវត្តធ្វើវិញ្ញាសារត្រៀមប្រឡងផ្សេងៗគ្រប់មុខវិទ្យា, ចំណុចទី៤ នោះគឺបន្តសិក្សាជាមួយលោកគ្រូ និងអ្នកគ្រូរហូតដល់ថ្ងៃប្រឡង ដើម្បីទទួលបានដំបូន្មានល្អៗ និងគន្លឹះផ្សេងៗក្នុងការប្រឡង, និងចំណុចទី៥ គឺរៀនគ្រប់គ្រងពេលវេលា ប្រសិនបើអនុវត្តលំហាត់ និងសំណួររួចរាល់មុនពេលវេលាកាន់តែល្អ នោះយើងនឹងអាចមានពេលវេលាក្នុងការពិនិត្យ និងកែតម្រូវចំណុចណាដែលខុសបាន។

រីឯសម្រាប់រយៈពេលមុនមួយថ្ងៃសម្រាប់ការប្រឡង​សញ្ញាបត្រ​មធ្យមសិក្សា​ទុតិយភូមិ វិសាល ក៏បានចែករំលែកឲ្យសិស្សទាំងអស់ ត្រួតពិនិត្យសម្ភារៈត្រៀមក្នុងការប្រឡងឲ្យបានគ្រប់គ្រាន់ និងគួរតែដឹងថាសម្ភារៈណាដែលអាចយកចូល និងសម្ភារៈណាដែលមិនអាចយកចូលបាន, ទៅពិនិត្យមើលឈ្មោះ និងលេខបន្ទប់ប្រឡង ហើយព្យាយាមធ្វើចិត្តឲ្យស្ងប់ឈប់គិតច្រើន កុំភ័យ ហើយជឿជាក់លើសមត្ថភាពរបស់ខ្លួនឯង និងប្រឹងប្រែងបញ្ចេញឲ្យអស់ក្នុងថ្ងៃប្រឡង ហើយញុំាអាហារល្អ ឲ្យគ្រប់គ្រាន់ ដើម្បីកុំឲ្យប៉ះពាល់ដល់សុខភាព រំលឹកមេរៀនបន្ថែម និងគេងឲ្យបានគ្រប់គ្រាន់ត្រៀមសម្រាប់ការប្រឡងថ្ងៃស្អែកផងដែរ៕ 

ជាចុងក្រោយ វិសាល ក៏បានផ្តាំផ្ញើនឹងលើកទឹកចិត្តដល់ប្អូនៗដែលត្រៀមប្រឡង​សញ្ញាបត្រ​មធ្យមសិក្សា​ទុតិយភូមិនាពេលខាងមុខទាំងអស់ ត្រូវខិតខំប្រឹងប្រែងបញ្ចេញសមត្ថភាពឲ្យអស់ពីលទ្ធភាពក្នុងថ្ងៃប្រឡង និងជូនពរឲ្យទទួលបាននិទ្ទេសល្អគ្រប់ៗគ្នាផងដែរ៕