ខេត្តព្រះសីហនុ៖ ថ្នាក់ដឹកនាំក្រសួងរៀបចំដែនដី បានដឹកនាំមន្ត្រីបច្ចេកទេសជំនាញ ចុះត្រួតពិនិត្យនៅតាមការដ្ឋានសំណង់មួយចំនួនទៀត នាខេត្តព្រះសីហនុ ដើម្បីឲ្យប្រាកដថា សំណង់ទាំងនោះសង់មានគុណភាព ស្របតាមបច្ចេកទេក និងមានច្បាប់អនុញ្ញាតត្រឹមត្រូវ។

សកម្មភាពខាងលើនេះ បានចាប់ផ្តើមកាលពីព្រឹកថ្ងៃទី៤ ខែសីហា ឆ្នាំ២០១៩នេះ ដឹកនាំដោយ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និង​លោក គួច ចំរើន អភិបាល​​ នៃគណៈអភិបាលខេត្តព្រះសីហនុ។ ហើយថា មានការដ្ឋានសំណង់ចំនួន​ ១៥កន្លែងទៀត​ នាខេត្តព្រះសីហនុ ដែលមន្ត្រីជំនាញបន្តចុះត្រួតពិនិត្យ នៅពេលនេះ។

នាឱកាសនោះ លោក គួច ចំរើន អភិបាល​ខេត្តព្រះសីហនុ មានប្រសាសន៍ថា ការបន្តចុះពិនិត្យការដ្ឋានសំណង់ នៅពេលនេះ ប្រយោជន៍ដើម្បីស្វែងរកភាពមិនប្រក្រតីមួយចំនួនរួមមាន៖ ដូចជាការសាងសង់គ្មានច្បាប់អនុញ្ញាត ឬសំណង់សង់ខុសបច្ចេកទេស ដោយមិនស្របទៅតាមស្តង់ដាត្រឹមត្រូវជាដើម។

ត្រង់ចំណុចនេះ លោក គួច ចំរើន បន្តថា កន្លងទៅថ្មីៗនេះ លោកឧបនាយករដ្ឋមន្ត្រី ជា សុផារ៉ា បានដឹកនាំមន្ត្រីជំនាញ ចុះពិនិត្យការដ្ឋានសំណង់ចំនួន៨កន្លែង ក្នុងក្រុងព្រះសីហនុ ដោយបានរកឃើញការដ្ឋានចំនួន ៦កន្លែង មានភាពមិនប្រក្រតី ហើយក៏បានសម្រេចផ្អាកការដ្ឋានសំណង់ទាំងនោះជាបណ្តោះអាសន្ន។

លោកបន្តថា ការចុះពិនិត្យសំណង់លើកនេះ លោក ជា សុផារ៉ា ក៏ដូចជាក្រុមការងារបច្ចេកទេស នឹងពិនិត្យផ្ទៀងផ្ទាត់ ទៅលើការដ្ឋានសំណង់មួយចំនួននោះ ដូចជាពេលមុនៗដែរ។ ហើយថា ក្នុងករណីមន្ត្រីជំនាញ បានរកឃើញសំណង់ទាំងនោះមានបញ្ហាមុនប្រក្រតី ទាក់ទិនបច្ចេកទេស និងសំណង់សង់គ្មានច្បាប់ជាដើម មន្ត្រីជំនាញ នឹងសម្រេចផ្អាកសកម្មភាព របស់ការដ្ឋានសាងសង់សំណង់អគារទាំងនោះភ្លាម ដើម្បីឲ្យជំនាញបន្តនីតិវិធីតាមផ្លូវច្បាប់៕ ដែន អយុធ្យា