ខេត្តកំពង់ស្ពឺ ត្រូវបានគេស្គាល់ថាជាខេត្តដែលសម្បូរទៅដោយដើមត្នោតច្រើនជាងគេនៅក្នុងប្រទេសកម្ពុជា។ មិនតែប៉ុណ្ណោះ ខេត្តនេះសម្បូរទៅដោយកន្លែងដើរលេងកម្សាន្តថងដែរ។​ ខាងក្រោមនេះ គឺជាកន្លែងដើរលេងទាំង ៦ដែលកំពុងតែពេញនិយមចំពោះភ្ញៀវទេសចរក្នុងស្រុក។ 

១. រមណីយដ្ឋានគីរីរម្យ

វាជាតំបន់ធម្មជាតិមួយដ៏សម្បូរបែប និងមានភាពទាក់ទាញគួរឲ្យចាប់អារម្មណ៍ គួរឲ្យចង់ទៅលេងកម្សាន្តដោយសារវាមាន ឧទ្យានជាតិព្រះសុរាម្រិតកុសមៈ រមណីដ្ឋានគីរីរម្យ(ក្រោម) និងទឹកជ្រោះអន្លង់រ័ត្ន ព្រមកន្លែងរមណីយដ្ឋានសប្បនិមិត្តផ្សេងៗទៀត។

២, រមណីយដ្ឋានចំបក់

ចំបក់ គឺជារមណីយដ្ឋានទេសចរណ៏ធម្មជាតិមួយកន្លែងដែលមានទីតាំងស្ថិតនៅ ឃុំចំបក់ ស្រុកភ្នំស្រួច ខេត្តកំពង់ស្ពឺ ដែលស្ថិតនៅភាគខាងត្បូងឈៀងខាងកើតនៃប្រទេសកម្ពុជាមានចម្ងាយប្រមាណ ១១០ គីឡូម៉ែត្រពី រាជធានីភ្នំពេញ។ រមណីយដ្ឋាននេះមានព្រំប្រទល់ជាប់នឹង ឧទ្យានជាតិគិរីរម្យ ផ្ទាល់តែម្តង។ 

៣, រមណីយដ្ឋានវប្បធម៌ និងធម្មជាតិ អំពែភ្នំ

អំពែភ្នំ ជារមណីយដ្ឋានធម្មជាតិ និងវប្បធម៌ដ៏ល្បីឈ្មោះមួយនៅខេត្តកំពង់ស្ពឺ។ វត្តអំពែភ្នំបានក្លាយតំបន់មានទេសភាពដ៏ស្រស់ស្អាត នៃទឹកស្ទឹងដែលហូរកាត់រួមជាមួយនឹងដើមឈើ ព្រៃព្រឹក្សាធំៗដែលប្រឹងដុះប្រជ្រៀតគ្នាអមសងខាងនៅតាមមាត់បឹងហើយនិងនៅតាមជើងភ្នំគឺមានស្ពានយោលសម្រាប់ដើរឆ្លងកាត់ពីភូមិតាំងទន្លេទៅភូមិអំពែភ្នំផងដែរ។

៤, តំបន់ទេសចរណ៍ជនជាតិសួយ

តំបន់មួយនេះ មានជនជាតិសួយរស់នៅចំនួន៣៦០០គ្រួសាររស់នៅក្នុងភូមិចំនួន៥ ក្នុងឃុំត្រពាំជោ ស្រុកឧិរ៉ាល់។ ចំពោះភ្ញៀវទេសចរដែលទៅកម្សាន្តនៅទីនោះ ច្រើនក៏ព្រោះតែចង់ទស្សនាវប្បធ៌មទំនៀមទំលាប់ ប្រពៃណីនិងការរស់នៅប្រចាំថ្ងៃរបស់ប្រជាជននៅទីនោះ ពិសេសជាងនេះទៅទៀតនោះភ្ញៀវទេសចរចង់ទៅទស្សនារបាំរបស់ជនចាតិសួយ និងរបាំផ្សេងៗទៀត។

៥, រមណីយដ្ឋានវប្បធម៌ធម្មជាតិភ្នំព្រះ

តំបន់ទេសចរណមួយនេះ មានផ្ទៃដីជាង ១០០ ហិកតា ពោរពេញដោយខ្យល់អាកាសបរិសុទ្ធអាចសម្រាកលំហែកាយត្រជាក់ខ្លួនស្រួល ត្បិតមានដើមឈើធំៗ ជាម្លប់ត្រឈឹងត្រឈៃនៅហ៊ុំព័ទ្ធជុំវិញ។ ចំណែកនៅក្នុងភ្នំវិញ ថែមទាំងមានល្អាងភ្នំ និងរូងភ្នំនានាសុទ្ធសឹងត្រូវបានរៀបចំជាទីសក្ការៈនិងគោរ ដោយមានព្រះបដិមាចាប់ពីបីទៅប្រាំព្រះអង្គ។ ហើយភាគច្រើនរូងភ្នំដែលគេតែងចូលទៅបន់ស្រន់ជាង គឺរូងព្រះ៥ព្រះអង្គ។ 

៦, រមណីយដ្ឋានល្អាងភ្នំចាស់

រមណីយដ្ឋានល្អាងភ្នំចាស់ ជារមណីយដ្ឋានបុរាណមានអាយុកាលរាប់ពាន់ឆ្នាំមកហើយ ដោយធ្លាប់ជាទីកន្លែងរបស់មនុស្សបុរេប្រវត្តិតាំងទីលំនៅទៀតផង។ ចំណែក ភ្នំចាស់ វិញ មានល្អាងបែកជារូងតូចដល់ទៅ៣០ ដោយខ្លះមានពន្លឺចាំងចូលអាចឱ្យភ្ញៀវទេសចរចូលលេងបាន ខ្លះទៀតងងឹតស្លុតមិនសូវមានមនុស្សហ៊ានចូលនោះទេ ហើយក្នុងនោះមានល្អាងធំជាងគេមួយ គឺមានឈ្មោះថាល្អាងជង្រុក។