ជារៀងរាល់ថ្ងៃ អ្នកណាៗក៏ប្រើប្រាស់ជើងដើម្បីធ្វើដំណើរ ក៏ដូចជាធ្វើចលនា តែយើងមិនបានធ្វើចលនាផ្ទាល់ទៅនឹងដីនោះទេ ដោយបានប្រើប្រាស់នូវស្រោមជើង និងស្បែកជើងដើម្បីការពារប៉ះផ្ទាល់ទៅនឹងដី ឬថ្នល់ជាដើម។

ប្រាកដណាស់ នៅពេលដែលយើងធ្វើចលនាច្រើន នោះប្រអប់ជើងរបស់យើងប្រាកដជាមានសភាពបែកញើស ស្អិត ហើយមានក្លិនរំខានជាដើម រឿងនេះកើតឡើងចំពោះទាំងបុរស និងស្ត្រី ពិសេសសម្រាប់បុរសៗដែលឧស្សាហ៍ពាក់ស្រោមជើងជិតៗជាមួយនឹងស្បែកជើងប៊ូ ពីព្រោះវាធ្វើឲ្យប្រអប់ជើងហប់ គ្មានខ្យល់ចេញចូល ហើយបណ្តាលឲ្យបែកញើសលឿន និងឆាប់ធំក្លិនជាដើម។

ហេតុដូច្នេះហើយ នៅពេលដែលយើងងូតទឹក គួរតែដុះសម្អាតនូវប្រអប់ជើងរបស់យើងឲ្យបានស្អាត ដើម្បីកម្ចាត់បាននូវធូលីកខ្វក់ដែលវាជាប់នៅនឹងស្រោមជើង ឬស្បែកជើង ក៏ដូចជាភាពផ្អាប់ទុកយូររយៈពេលពេញមួយថ្ងៃរបស់អ្នកជាមួយនឹងសាប៊ូ ឬក៏ទឹកក្តៅអ៊ុនៗជាដើម ដោយដុសអង្អែលថ្នមៗ កុំប្រើកម្លាំងខ្លាំងពេក ជៀសវាងការរលាត់ ឬដាច់ស្បែក។

 គួរបន្ថែមផងដែរថា ការលាងសម្អាតនូវប្រអប់ជើងរបស់អ្នក រួមទាំង ម្រាមជើង ស្មងជើង កែងជើងជាដើមនោះ និយាយរួមទៅគឺពេញបរិវេណប្រអប់ជើងទាំងមូលអាចផ្តល់នូវអត្ថប្រយោជន៍ដល់អ្នកទាំងអស់គ្នាជាច្រើនរួមមាន៖ 

១.បំបាត់ការធំក្លិនពេញមួយថ្ងៃ

២.ធ្វើឲ្យជើងរបស់អ្នកស្អាត គួរឲ្យចង់ប៉ះ

៣.មានសភាពស្រស់ស្អាត

៤.ជួយសម្រួលដល់ដំណើរការនៃរបត់ឈាមឲ្យដើរបានស្រួល

៥.ជួយឲ្យអ្នកធ្វើចលនាបានល្អ រហ័សរហួន

៦.ជួយការពារ និងកាត់បន្ថយនូវការប្រេះក្រហែង ឬរបកស្បែកជើងរបស់អ្នកជាដើម។

៧.ជួយសម្រួលដល់ដំណើរការនៃសន្លាក់ ឆ្អឹងខ្នង សរសៃឈាម ប្រព័ន្ធដំណើរការផ្សេងៗទៀតនៃរាងកាយរបស់អ្នក។

សារៈប្រយោជន៍ដែលបានរៀបរាប់ខាងលើនេះ គឺគ្រាន់តែជាអត្ថប្រយោជន៍មួយចំនួនប៉ុណ្ណោះ តែវានៅមានលក្ខខណ្ឌដែលអាចជួយដល់ប្រព័ន្ធរាងកាយរបស់លោកអ្នកបន្ថែមលើសនេះទៅទៀត។ ហេតុនេះអ្នកទាំងអស់គ្នា មិនគួរមើលរំលងនូវចំណុចមួយនេះទេ ពីព្រោះថាប្រអប់ជើងជាសរីរាង្គសំខាន់មួយផ្នែកនៃសារពាង្គកាយរបស់យើងទាំងអស់គ្នា៕

ប្រែសម្រួលដោយ៖ ឌីរ៉ា