កាំជ្រួចជិត១០០គ្រាប់ ត្រូវបានបាញ់ចេញពីខាងប្រទេសអ៊ីរ៉ង់ ឆ្ពោះទៅកាន់ភាគកណ្តាល និងភាគខាងជើង នៃប្រទេសអ៊ីស្រាអែល ក្នុងការរារាំងដ៏ធំចំនួនពីរពីអ៊ីស្រាអែល ដែលបណ្តាលឱ្យមានការខូចខាតយ៉ាងខ្លាំងក្លា និងបណ្តាលឲ្យមនុស្សចំនួន ៤១នាក់រងរបួស។ នេះបើយោងតាមយោធាអ៊ីស្រាអែល និងសេវាកម្មសង្គ្រោះជាតិ Magen David Adom (MDA)។

MDA បានរាយការណ៍ថា មនុស្សចំនួន ២នាក់បានរងរបួសធ្ងន់ធ្ងរ ២នាក់ទៀតស្ថិតក្នុងស្ថានភាពសង្គ្រោះ  និង ៤នាក់ស្រាល ខណៈដែលចំនួន ៣២នាក់ផ្សេងទៀតរងរបួសស្រាលមិនធ្ងន់ធ្ងរ។ យ៉ាងណាមិញ បន្ទាប់ពីការវាយប្រហារ ស៊ីរ៉ែនការពារអាកាសក៏ត្រូវបានបន្លឺឡើង ដោយបានបញ្ជូនអ្នកស្រុករាប់លាននាក់ទៅកាន់បន្ទប់ការពារ និងជម្រកសុវត្ថិភាពអស់រយៈពេលជាងមួយម៉ោង។

អ្នកនាំពាក្យកងកម្លាំងការពារអ៊ីស្រាអែល (IDF) លោក Effie Defrin បាននិយាយថា មីស៊ីលភាគច្រើនត្រូវបានស្ទាក់ចាប់ដោយប្រព័ន្ធការពារដែនអាកាស ឬមិនបានទៅដល់គោលដៅដែលអ៊ីរ៉ង់ចង់វាយប្រហារនោះទេ។

ស្របពេលដែរ រដ្ឋមន្ត្រីការពារជាតិអ៊ីស្រាអែល Israel Katz បាននិយាយបន្ទាប់ពីការវាយប្រហាររបស់អ៊ីរ៉ង់ថា «អ៊ីរ៉ង់បានឆ្លងកាត់បន្ទាត់ក្រហម នៅពេលដែលខ្លួនហ៊ានបាញ់មីស៊ីលទៅកាន់មជ្ឈមណ្ឌលប្រជាជនស៊ីវិលក្នុងប្រទេសអ៊ីស្រាអែល»។

លោកបានបន្តថា «យើងនឹងបន្តការពារពលរដ្ឋអ៊ីស្រាអែល ដោយព្រមានថាប្រទេសអ៊ីរ៉ង់ត្រូវទទួលខុសត្រូវ សម្រាប់សកម្មភាពឧក្រិដ្ឋកម្មរបស់ខ្លួន»។

គួរបញ្ជាក់ផងដែរថា កាលពីព្រឹកព្រលឹម​ថ្ងៃទី១៣ ខែមិថុនា កន្លងទៅ ​ក្រសួង​ការពារជាតិ​អ៊ីស្រាអែលបាន​ថ្លែងថា​ អ៊ីស្រាអែល​បានវាយប្រហារ​ចំពោះអ៊ីរ៉ង់។ ដោយកងទ័ព​ជើងអាកាស​អ៊ីស្រាអែល​កំពុង​វាយប្រហារ​តាមអាកាស​ចំពោះ​គោលដៅ​រាប់សិប​ដែល​ពាក់ព័ន្ធនឹង​ផែនការ​នុយក្លេអ៊ែរ​និងសំណង់​យោធាផ្សេងទៀត​ក្នុងដែនអ៊ីរ៉ង់ ​ហើយ​ដាក់ឈ្មោះ​សកម្មភាព​លើកនេះជា ​“កម្លាំងនៃសត្វតោ”​ ផងដែរ៕