ក្រុមផ្តល់ជំនួយនៅក្នុងប្រទេសមីយ៉ាន់ម៉ាកាលពីថ្ងៃអង្គារ បានពណ៌នាអំពីទិដ្ឋភាពនៃការបំផ្លិចបំផ្លាញ និងភាពអស់សង្ឃឹមបន្ទាប់ពីការរញ្ជួយដីដែលបានសម្លាប់មនុស្សជាង ២,៧០០ ដោយសង្កត់ធ្ងន់ទៅលើតម្រូវការបន្ទាន់សម្រាប់អាហារ ទឹក និងទីជម្រក ហើយនិងការស្វែងរកអ្នកនៅរស់រានមានជីវិត។

មេដឹកនាំយោធាមីយ៉ាន់ម៉ា លោក Min Aung Hlaing បាននិយាយថា ចំនួនអ្នកស្លាប់ដោយសារគ្រោះរញ្ជួយដីកម្រិត ៧.៧ រ៉ិចទ័រកាលពីថ្ងៃសុក្រ ត្រូវបានគេរំពឹងថានឹងកើនលើស ៣,០០០នាក់ ដោយបានឡើងដល់ ២,៧១៩នាក់ គិតត្រឹមព្រឹកថ្ងៃអង្គារ ដោយមនុស្សចំនួន ៤,៥២១នាក់បានរងរបួស និង ៤៤១នាក់បាត់ខ្លួន។ លោកបាននិយាយនៅក្នុងសុន្ទរកថាមួយថា ក្នុងចំណោមអ្នកបាត់ខ្លួន ភាគច្រើនត្រូវបានគេសន្មត់ថាបានស្លាប់ ដោយមានឱកាសតិចណាស់សម្រាប់ពួកគេដែលនៅរស់។

ការរញ្ជួយដីដែលបានវាយប្រហារកាលពីថ្ងៃសុក្រ គឺជាកម្លាំងខ្លាំងបំផុតដែលបានវាយប្រហារប្រទេសអាស៊ីអាគ្នេយ៍ក្នុងរយៈពេលជាងមួយសតវត្សរ៍ ដោយបានបំផ្លិចបំផ្លាញវត្តបុរាណ និងអគារទំនើបៗជាច្រើន។ គ្រោះរញ្ជួយដីនេះ បានធ្វើឱ្យខូចខាតយ៉ាងធ្ងន់ធ្ងរជាងគេទៅលើទីក្រុង Mandalay របស់ប្រទេសមីយ៉ាន់ម៉ា និងបានរាលដាលទៅដល់ប្រទេសជិតខាងរួមទាំងប្រទេសថៃ និង វៀតណាមផងដែរ៕