១. ព្រះមហាក្សត្រ ព្រះបរមរាជានុញ្ញាតជូន អគ្គរដ្ឋអាជ្ញារុស្ស៊ី ចូលក្រាបថ្វាយបង្គំគាល់

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្តេចសព្វព្រះរាជហឬទ័យ ព្រះបរមរាជានុញ្ញាតជូន ឯកឧត្តម Igor Krasnov អគ្គរដ្ឋអាជ្ញារុស្ស៊ី ចូលក្រាបថ្វាយបង្គំគាល់ នាថ្ងៃទី២៧ ខែឧសភា ឆ្នាំ២០២៥ នៅព្រះបរមរាជវាំង រាជធានីភ្នំពេញ។

២. កម្ពុជា ចិន ឯកភាពជំរុញកិច្ចសហប្រតិបត្តិការលើគ្រប់វិស័យឱ្យកាន់តែរីកចម្រើនថែមទៀត

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជួបប្រជុំពិភាក្សាការងារទ្វេភាគី ជាមួយ ឯកឧត្តម លី ឈាង (Li Qiang) នាយករដ្ឋមន្ត្រីនៃសាធារណរដ្ឋប្រជាមានិតចិន ក្នុងឱកាសអញ្ជើញចូលរួមកិច្ចប្រជុំកំពូលអាស៊ានលើកទី ៤៦ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី។

៣. សពកងកម្លាំងរក្សាសន្តិភាពកម្ពុជាដែលធ្វើពលិកម្មនៅប្រទេសស៊ូដង់ខាងត្បូងបានដឹកមកដល់កម្ពុជាដើម្បីរៀបចំធ្វើបុណ្យតាមប្រពៃណី

សពកងកម្លាំងរក្សាសន្តិភាពកម្ពុជា០២រូប ដែលបានធ្វើពលិកម្មក្នុងពេលបំពេញបេសកកម្ម របស់អង្គការសហប្រជាជាតិ នៅសាធារណរដ្ឋស៊ូដង់ខាងត្បូង ត្រូវបានដឹកត្រឡប់មកដល់ប្រទេសកម្ពុជាហើយ នៅល្ងាចថ្ងៃទី២៦ ខែឧសភា ឆ្នាំ២០២៥នេះ ដើម្បីរៀបចំធ្វើបុណ្យតាមប្រពៃណី។

៤. ក្រុមអត្តពលិកកីឡាជឺជីតស៊ូកម្ពុជាដណ្តើមបានមេដាយសរុបទាំងអស់ ១១គ្រឿង នៅប្រទេសហ្សកដានី

អបអរសាទ! ក្រុមអត្តពលិកកីឡាជឺជីតស៊ូកម្ពុជា បានបន្ថែមមេដាយ មាស២គ្រឿង និង សំរិទ្ធ ១គ្រឿងទៀត ជូនកម្ពុជានៅថ្ងៃប្រកួតចុងក្រោយ ក្នុងព្រឹត្តិការណ៍ជើងឯកទ្វីបអាស៊ី លើកទី៩ ថ្ងៃទី ២២–២៦ ខែឧសភា ២០២៥ នៅប្រទេសហ្សកដានី។

៥. ប្រធានាធិបតីបារាំងបកស្រាយរឿងភរិយារុញមុខលើយន្តហោះថាជាការលេងសើច

ប្រធានាធិបតីបារាំងលោក Emmanuel Macron និយាយថាវីដេអូដែលបានផ្សព្វផ្សាញបង្ហាញភរិយារបស់លោកបានរុញមុខលោកនោះ ថាពួកគេគ្រាន់តែលេងសើចប៉ុណ្ណោះ។

៦. មនុស្សរាប់សិបនាក់រងរបួសបន្ទាប់ពីរថយន្តបើកបំបុកចូលក្រុមអ្នកគាំទ្រក្បួនដង្ហែក្រុម Liverpool

មនុស្សជិត ៥០នាក់បានរងរបួសបន្ទាប់ពីអ្នកបើកបរបំបុកចូលទៅក្នុងក្បួនដង្ហែរហ្វូងមនុស្សនៅទីក្រុង Liverpool។

ប៉ូលីសបាននិយាយថា អ្នកបើកបរជាបុរសជនជាតិអង់គ្លេសអាយុ ៥៣ឆ្នាំត្រូវបានចាប់ខ្លួន ប៉ុន្តែព្រឹត្តិការណ៍នេះមិនត្រូវបានចាត់ទុកថាជាអំពើភេរវកម្មនោះទេ ខណៈនាយករដ្ឋមន្ត្រី Keir Starmer បានពណ៌នានេះជាហេតុការណ៍ "គួរឱ្យរន្ធត់" ។

៧. ខេត្តកំពត ជាខេត្តទី២១ ទទួលបានជ័យលាភីបញ្ចប់ការបន្ទោបង់ពាសវាលពាសកាល

រដ្ឋមន្ត្រីក្រសួងអភិវឌ្ឍន៍ជនបទ ឯកឧត្តម ឆាយ ឫទ្ធិសែន បានអញ្ជើញជាអធិបតីក្នុង ពិធីប្រកាសទទួលស្គាល់ជាផ្លូវការ ខេត្តកំពតជាខេត្តទី២១ ទទួលបានជ័យលាភីបញ្ចប់ការបន្ទោបង់ពាសវាលពាសកាល (ODF)។

៨. កម្ពុជា-ម៉ាឡេស៊ី វាយតម្លៃខ្ពស់ចំពោះភាពរីកចម្រើននៃទំនាក់ទំនងប្រទេសទាំងពីរ

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជួបប្រជុំពិភាក្សាការងារទ្វេភាគីជាមួយ ឯកឧត្តម ដាតុ ស៊េរី អាន់វ៉ា អ៉ីប្រាហ៊ីម (Dato' Seri Anwar Ibrahim) នាយករដ្ឋមន្រ្តី នៃប្រទេសម៉ាឡេស៊ី ក្នុងឱកាសអញ្ជើញចូលរួមកិច្ចប្រជុំកំពូលអាស៊ានលើកទី ៤៦ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី នាសៀលថ្ងៃទី២៦ ខែឧសភា ឆ្នាំ២០២៥។

៩. កំលាំង​នគរបាលបង្រ្កាបជនសង្ស័យចំនួន​ ២នាក់​ ដកហូតបានគ្រឿងញៀន​ ១០កញ្ចប់​

នាថ្ងៃទី២៦ ខែឧសភា ឆ្នាំ២០២៥​ កំលាំងនគរបាល​ទទួល​បាន​ព័ត៌​មា​ន​ពីប្រជាពលរដ្ឋដែលបា​នរាយការណ៍​អំពីមុខស​ញ្ញា​រក្សាទុក​សារធាតុ​ញៀន​ពង្វក់ក្មេងៗ​ ។

១០. ព្រះសង្ឃជាង ១០អង្គ និងយាយជី ២នាក់ មានអាការៈក្អួតចង្អោរបន្ទាប់ពីឆាន់ផ្សិតឬស្សី

កាលពីថ្ងៃទី២៥ ខែឧសភា ឆ្នាំ២០២៥ មានករណីព្រះសង្ឃគង់នៅវត្តចន្ទគីរី ជាង១០អង្គ និងយាយជី២នាក់ បានពុលផ្សិតក្រោយពីដកផ្សិតឬស្សីមកធ្វើចង្ហាន់ថ្ងៃត្រង់ នៅចំណុចឃុំល្វាក្រាំង ស្រុកវ៉ារិន ខេត្តសៀមរាប។