អាជ្ញាធរខេត្តពោធិ៍សាត់បានត្រៀមកម្លាំង និងរថយន្ត ប្រមាណ ១៧០គ្រឿង រួចរាល់ក្នុងការជួយអន្តរាគមន៍ ជម្លៀសប្រជាពលរដ្ឋប្រមាណ ៣០០០នាក់ ដែលស្មើនឹង៨០០គ្រួសារ នៅតាមព្រំដែនទៅកាន់ទីតាំងមាន សុវត្ថិភាពក្នុងករណីមានហេតុការណ៍ណាមួយកើត ឡើងដោយយថាហេតុ។

នារសៀលថ្ងៃទី១៤ ខែមិថុនា ឆ្នាំ២០២៥ ឯកឧត្ដម ខូយ រីដា អភិបាល នៃគណៈអភិបាលខេត្តពោធិ៍សាត់ ឯកឧត្ដម ខូយ រីដា បានចុះពិនិត្យស្ថានភាពជាក់ស្តែង នៅឃុំថ្មដា ស្រុកវាលវែង ជាប់ព្រំប្រទល់ខេត្តត្រាត ប្រទេសថៃ និងបានដឹកនាំរៀបចំកម្លាំង និងរថយន្តត្រៀមជម្លៀសប្រជាពលរដ្ឋនៅតាមព្រំដែនទៅកាន់ទីតាំងមានសុវត្ថិភាព។ 

ក្នុងឱកាសនោះ ឯកឧត្ដមអភិបាលខេត្ត បានបញ្ជាក់ថា ដោយគោរពតាមបទបញ្ជារបស់រាជរដ្ឋាភិបាល ដែល យកចិត្តទុកដាក់ពីសុខសុវត្ថិភាពរបស់ប្រជាពលរដ្ឋ នៅតាមបន្ទាត់ព្រំដែនក្នុងខេត្តពោធិ៍សាត់ កម្លាំងជួរមុខ បានត្រៀមលក្ខណៈជាស្រេចក្នុងការការពារបូរណភាព ទឹកដី ហើយអាជ្ញាធរខេត្តបានត្រៀមកម្លាំង និងរថយន្តប្រមាណ ១៧០គ្រឿង រួចរាល់ក្នុងការជួយអន្តរាគមន៍ ជម្លៀសប្រជាពលរដ្ឋ។

ឯកឧត្ដម បានបន្ថែមថា ចំពោះចរន្តអគ្គីសនី ប្រព័ន្ធអ៊ីនធឺរណែត ក្នុងស្រុកវាលវែង ពុំមានតភ្ជាប់ពីប្រទេសថៃទេគឺប្រើប្រភពក្នុងខេត្តទាំងអស់។

គួរឲ្យដឹងដែរថា ខេត្តពោធិ៍សាត់ មាន ៧ក្រុង-ស្រុក ក្នុងនោះមានតែស្រុកវាលវែង ដែលមានព្រំប្រទល់ជាមួយ ខេត្តត្រាតប្រទេសថៃ ដោយភ្ជាប់មកទីរួមខេត្ត តាមរយៈផ្លូវជាតិលេខ៥៥ ដែលមានចម្ងាយ ជិត ២០០គីឡូម៉ែត្រ ស្រុកវាលវែង មានឃុំចំនួន៥ មាន គម្រោងវារីអគ្គិសនី ចំនួន២ គឺគម្រោងវារីអគ្គិសនី អាតៃ អនុភាព ១២០ មេហ្គាវ៉ាត់ ស្ថិតក្នុងឃុំអូរសោម កំពុង ដំណើរការ និងគម្រោងវារីអគ្គិសនី ស្ទឹងពោធិ៍សាត់១ អនុភាព៨០មេហ្គាវ៉ាត់ ស្ថិតក្នុងឃុំប្រម៉ោយ៕