យោងតាមច្បាប់របស់ប្រទេសចិន ប្រទេសចិនបានចោទប្រកាន់សមាជិកសំខាន់ៗចំនួន ២១នាក់នៃក្រុមឧក្រិដ្ឋកម្មតាមប្រព័ន្ធអ៊ីនធឺណិត ដែលប្រតិបត្តិការនៅភាគខាងជើងប្រទេសមីយ៉ាន់ម៉ា លើបទចោទប្រកាន់ជាច្រើន រួមមានការក្លែងបន្លំ ប្រតិបត្តិការកាស៊ីណូ ឃាតកម្មដោយចេតនា ការផលិតគ្រឿងញៀន និងបទល្មើសផ្សេងទៀតដែលផ្តោតលើជនស៊ីវិលនៅក្នុងប្រទេសចិន។យោងតាមអាជ្ញាធរសន្តិសុខសាធារណៈរបស់ប្រទេសចិន ក្រុមឧក្រិដ្ឋជននេះត្រូវបានគេសង្ស័យថាមានជាប់ពាក់ព័ន្ធក្នុងសកម្មភាព ដែលនាំទៅដល់ការស្លាប់របស់ពលរដ្ឋចិនចំនួនប្រាំមួយនាក់ និងត្រូវបានគេរកឃើញថាជាប់ពាក់ព័ន្ធនឹងករណីក្លែងបន្លំតាមប្រព័ន្ធអ៊ីនធឺណិតជាង ៣១,០០០ករណី ដែលគិតជាទឹកប្រាក់គឺលើសពី ១.៤៨ពាន់លានដុល្លារអាម៉េរិក។ បន្ថែមពីនេះ អាជ្ញាធរសន្តិសុខសាធារណៈរបស់ប្រទេសចិន ក៏បានស៊ើបអង្កេតរកឃើញថាក្រុម​ឧក្រិដ្ឋជនដ៏សំខាន់នេះ ​​មាន​ពាក់ព័ន្ធ​នឹង​ការ​ផលិត ​ក៏ដូចជា​ជួញ​ដូរ​ថ្នាំ​ញៀនខុសច្បាប់​ប្រមាណជាង ​១១​តោនផងដែរ៕​