​បុរសភេទទី៣ ដែលអ្នកនិយមលេងបណ្តាញសង្គមហៅថា​ចែហុងនោះ ត្រូវបានចាប់ខ្លួនពីបទក្លែងបន្លំខ្លួនជាស្ត្រីដើម្បីទាក់ទាញបុរសជាង ១,៦០០ នាក់ឱ្យរួមភេទហើយបានថតវីដេអូដោយសម្ងាត់ និងចែកចាយតាមអ៊ីនធឺណែត។

ប៉ូលិសក្នុងតំបន់បានឃាត់ខ្លួនជនសង្ស័យកាលពីថ្ងៃទី ៥ ខែកក្កដា ពីបទផ្សព្វផ្សាយខ្លឹមសារអាសអាភាស។ លោកទទួលបានភាពល្បីល្បាញនៅលើប្រព័ន្ធផ្សព្វផ្សាយសង្គមចិនក្រោមឈ្មោះហៅក្រៅថា Uncle Red មានអាយុ ៣៨ ឆ្នាំរស់នៅទីក្រុង Nanjing ប្រទេសចិន។ អាជ្ញាធរបាននិយាយថា ​បុរសរូបនេះតែងតែស្លៀកពាក់គ្រឿងសម្អាងធ្ងន់ៗ សក់ពាក់ និងសំពត់វែង ដើម្បីបញ្ជាក់ពីអត្តសញ្ញាណនារី ដោយបានទាក់ទាញបុរសជាច្រើនមកស្នាក់នៅផ្ទះឯកជនរបស់ខ្លួន។ លោកត្រូវបានចោទប្រកាន់ថាបានដំឡើងកាមេរ៉ាលាក់ ដើម្បីថតដោយគ្មានការយល់ព្រមពីជនរងគ្រោះ និងបង្ហោះវីដេអូទាំងនោះចូលទៅក្នុងក្រុមឯកជនតាមអ៊ីនធឺណែតទៀតផង។

ជន​រង​គ្រោះ​មួយ​ចំនួន​បាន​រក​ឃើញ​វីដេអូ​លេច​ធ្លាយ​នោះ ហើយ​បាន​រាយការណ៍​ទៅ​អាជ្ញាធរ។ ខណៈពេលដែលជនសង្ស័យត្រូវបានគេរាយការណ៍ថា មិនបានទាមទារប្រាក់ពីជនរងគ្រោះដោយផ្ទាល់នោះទេ ដោយស្នើសុំរបស់តិចតួចដូចជាទឹកដោះគោ ផ្លែឈើ ឬប្រេងឆាតែប៉ុណ្ណោះ។ ជាការឆ្លើយតបទៅនឹងការព្រួយបារម្ភជាសាធារណៈកាន់តែខ្លាំងឡើង មជ្ឈមណ្ឌលគ្រប់គ្រង និងបង្ការជំងឺរបស់ទីក្រុង Nanjing បានប្រកាសថា ខ្លួននឹងផ្តល់ការពិនិត្យសុខភាពដល់អ្នកដែលរងផលប៉ះពាល់ ទោះបីជាខ្លួនបានបដិសេធមិនបញ្ជាក់ថាតើជនសង្ស័យបានឆ្លងជំងឺកាមរោគដោយលើកឡើងពីច្បាប់ឯកជនភាពក៏ដោយ៕