ថ្ងៃទី១៩ ខែកក្កដា រដ្ឋាភិបាលកម្ពុជាបានផ្ញើលិខិតមួយច្បាប់ទៅអាជ្ញាធរថៃ ទាក់ទងនឹងការច្រានចោលរបាយការណ៍របស់ប្រព័ន្ធផ្សព្វផ្សាយថៃមួយចំនួន ពាក់ព័ន្ធនឹងករណីទាហានថៃ៣នាក់រងរបួសដោយសារគ្រាប់មីននៅតំបន់ Mum Bay (Chong Bok) កាលពីថ្ងៃទី១៦ ខែកក្កដា។

ខ្លឹមសារមួយផ្នែកបានបញ្ជាក់ថា កម្ពុជាជារដ្ឋភាគីនៃអនុសញ្ញាស្តីពីការហាមឃាត់ការប្រើប្រាស់មីនប្រឆាំងមនុស្ស (អនុសញ្ញាអូតាវ៉ា) ហើយបានអនុវត្តយ៉ាងម៉ឺងម៉ាត់នូវកាតព្វកិច្ចរបស់ខ្លួន រួមទាំងបទដ្ឋាន និងស្មារតីនៃអនុសញ្ញានេះ។

បន្ថែមលើនេះ ការិយាល័យសកម្មភាពកំចាត់មីន បដិសេធទាំងស្រុង និងច្រានចោលរាល់ការចោទប្រកាន់របស់បណ្តាញសារព័ត៌មានថៃមួយចំនួន និងសូមអំពាវនាវដល់ភាគីពាក់ព័ន្ធទាំងអស់ ជៀសវាងការសន្មត់ ឬការចោទប្រកាន់ដោយមិនដឹងការពិត ជំរុញកិច្ចសហប្រតិបត្តិការស៊ើបអង្កេតលើឧបទ្ទវហេតុនេះ និងរក្សាស្មារតីមិត្តភាព សន្តិសុខ និងមិនចោទប្រកាន់គ្នាទៅវិញទៅមក ព្រោះសត្រូវពិតប្រាកដរបស់យើងទាំងអស់គ្នាគឺគ្រាប់មីន៕