ផ្លែទន្លាប់ គឺជាផ្លែឈើមួយប្រភេទដែលមានរសជាតិផ្អែមឆ្ងាញ់ ប៉ុន្តែចត់ប្រសិនបើមិនទាន់ទុំល្អ។ ភាគច្រើននៃពួកយើងសុទ្ធតែធ្លាប់បានទទួលទាន ឬស្គាល់ផ្លែឈើមួយនេះរួចទៅហើយ តែប្រហែលជាមិនចាប់អារម្មណ៍ទេថា ការទទួលទានវាអាចផ្ដល់ផលល្អៗយចំពោះសុខភាពរាងកាយ។ ថ្ងៃនេះយើងខ្ញុំនឹងបង្ហាញឲ្យដឹងអំពីអត្ថប្រយោជន៍អស្ចារ្យមិនគួរឲ្យជឿនៃការទទួលទានផ្លែទន្លាប់៖​

១. ផ្ទុកទៅដោយសារធាតុ Phytochemicals

ផ្លែទន្លាប់ គឺមានផ្ទុកទៅដោយសារធាតុ phytochemicals រួមទាំង catechins និងសារធាតុប្រឆាំងអុកស៊ីតកម្ម polyphenolic ដែលមានឥទ្ធិពលប្រឆាំងនឹងការរលាកក្នុងរាងកាយ ហើយក៏ជាភ្នាក់ងារប្រឆាំងរោគឆ្លងផ្សេងៗផងដែរ។ ដូច្នេះហើយទើបការទទួលទានផ្លែទន្លាប់អាចជួយទប់ស្កាត់ការរលាកក្នុងរាងកាយ និងរោគឆ្លង។

២. ពង្រឹងសុខភាពប្រព័ន្ធរំលាយអាហារ

ផ្លែទន្លាប់ ក៏ជាប្រភពដ៏ប្រសើរនៃជាតិសរសៃដែលចាំបាច់សម្រាប់ចលនាពោះវៀនល្អត្រឹមត្រូវ។ ការទទួលទានផ្លែឈើដែលមានផ្ទុកជាតិសរសៃខ្ពស់ជាប្រចាំ គឺអាចជួយកាត់បន្ថយបញ្ហាទាក់ទងនឹងចលនាពោះវៀនដែលល្អក្នុងការរក្សាប្រព័ន្ធរំលាយអាហារអោយមានសុខភាពល្អ។ ចំណែកសារធាតុ Tannins ដែលមានវត្តមាននៅក្នុងផ្លែទន្លាប់ជួយគ្រប់គ្រងចលនាពោះវៀនសម្រាលអាការនៃជំងឺរាគ។ ជាលទ្ធផលវាជួយរក្សាប្រព័ន្ធរំលាយអាហារឱ្យមានសុខភាពល្អរឹងមាំ។

៣. ល្អសម្រាប់អ្នកជំងឺទឹកនោមផ្អែម

អ្នកដែលមានជំងឺទឹកនោមផ្អែម គឺងាយនឹងឃ្លានណាស់។ ការទទួលទានអាហារ ឬផ្លែឈើដែលសម្បូរទៅដោយជាតិសរសៃជួយទប់ស្កាត់កម្រិតនៃការឃ្លាន។ ដូច្នេះផ្លែទន្លាប់ជាជម្រើសនៃផ្លែឈើដ៏ប្រសើរសម្រាប់អ្នកជំងឺទឹកនោមផ្អែម ដោយវាក៏មានប្រសិទ្ធិភាពគ្រប់គ្រងកម្រិតជាតិស្ករក្នុងឈាមផងដែរ។

៤. ល្អសម្រាប់អ្នកជំងឺលើសឈាម

ផ្លែទន្លាប់ មានផ្ទុកជាតិសូដ្យូមទាបដែលធ្វើឲ្យវាក្លាយជាជម្រើសនៃផ្លែឈើល្អសម្រាប់អ្នកជំងឺលើសឈាម។ ដូចដែលបានដឹងថា ការទទួលទានអាហារមានជាតិសូដ្យូមខ្ពស់ គឺអាចបណ្ដាលឲ្យកើតមានបញ្ហាសម្ពាធឈាមឡើងខ្ពស់។

៥. ពង្រឹងប្រព័ន្ធភាពស៊ាំនៃរាងកាយ

ផ្លែទន្លាប់ ក៏ជាប្រភពដ៏ប្រសើរនៃវីតាមីន C នៅពេលដាក់បញ្ជូលវាទៅក្នុង​របបអាហារប្រចាំថ្ងៃនោះវាអាចជួយពង្រឹងកម្រិតនៃប្រព័ន្ធភាពស៊ាំ។ ដូច្នេះការទទួលទានផ្លែទន្លាប់ជួយរាងកាយប្រយុទ្ធប្រឆាំងនឹងជំងឺឆ្លងផ្សេងៗ ក៏ដូចជាបញ្ហាទាក់ទងជាមួយសួត រួមបញ្ចូលទាំងជំងឺហឺត។

៦. ជួយប្រយុទ្ធប្រឆាំងនឹងជំងឺមហារីក

ផ្លែទន្លាប់ មានផ្ទុកទៅដោយសារធាតុប្រឆាំងអុកស៊ីតកម្មដែលជួយក្នុងការកម្ចាត់ ក៏ដូចជាកាត់បន្ថយរ៉ាឌីកាល់សេរី (ម៉ូលេគុលបង្កជំងឺមហារីក)។ វត្តមាននៃវីតាមីន A និងសារធាតុ shibuol រួមទាំង betulinic acid នៅក្នុងផ្លែទម្លាប់បង្កើននូវលក្ខណៈសម្បត្តិប្រយុទ្ធប្រឆាំងនឹងជំងឺមហារីករបស់ផ្លែឈើនេះផងដែរ។

៧. ​បង្កើនសុខភាពភ្នែក

ផ្លែទន្លាប់មានផ្ទុកនូវវីតាមីន A ក្នុងបរិមាណច្រើនគួរសម ដែលប្រសើរសម្រាប់សុខភាពភ្នែក និងធ្វើឲ្យមើលឃើញបានកាន់តែច្បាស់៕