ភ្នំភ្លើងនៅក្នុងប្រទេសឥណ្ឌូនេស៊ី លើកោះ បាលី ឈ្មោះថា ភ្នំភ្លើង Mount Agungនោះ កាលពីរសៀលថ្ងៃព្រហស្បតិ៍ បានផ្ទុះម្តងទៀត ប៉ុន្តែពុំមានការផ្សព្វផ្សាយអំពីគ្រោះថ្នាក់ដល់អាយុជីវិតមនុស្ស ដោយសារតែការផ្ទុះនៅពេលនេះទេ ។

ក្រុមអ្នកសង្កេតការណ៍ការរញ្ជួយផែនដី និងផ្ទុះភ្នំភ្លើងឥណ្ឌូនេស៊ី (PVMBG)បញ្ជាក់ថា ភ្នំភ្លើងចាប់ផ្តើមសកម្មភាពនៅវេលាម៉ោង១៨និង២៥នាទី (ម៉ោងនៅក្នុងតំបន់) ថ្ងៃទី២៨ ខែមីនា ឆ្នាំ២០១៩ ។ ប្រហែលជា២នាទី វាបាញ់ចេញកម្អែរភ្លើង និងបាញ់ផ្សែងខ្មួលខ្មាញ់ទាំងពណ៌លឿង និងខ្មៅទៅលើអាកាស ។

រហូតមកដល់ព្រឹកថ្ងៃទី២៩ ខែមីនា សកម្មភាពតាមដាន និងត្រួតពិនិត្យរបស់ក្រុមជំនាញ នៅតែបន្តសង្កេតមើលដដែលទៅលើសកម្មភាពរបស់ភ្នំភ្លើងមួយនេះ ។ ការព្រមានឲ្យប្រុងប្រយ័ត្នចំពោះប្រជាពលរដ្ឋនៅតំបន់ ភាគខាងកើតកោះបាលី គឺក្នុងភូមិសាស្ត្រ Karangasem នៅតែស្ថិតនៅក្នុងកម្រិតខ្ពស់បំផុតដដែល គឺកម្រិតលេខ៤ ។

ពលរដ្ឋរស់នៅតាមដងទន្លេខ្សែទឹកខាងក្រោមនៃភ្នំភ្លើង ក៏ត្រូវបានប្រកាសឲ្យប្រុងប្រយ័ត្ន ដែលអាចជាយថាហេតុ ផ្សែង និងកម្អែភ្នំភ្លើងបក់បោកធ្លាក់ចូលទន្លេ បះពាល់ដល់ពលរដ្ឋរស់នៅតាមតំបន់នោះ ។

កាលពីឆ្នាំ២០១៧ ភ្នំភ្លើង Mount Agung បានផ្ទុះ បណ្តាលឲ្យអ្នកស្រុកជាង៤៣,០០០នាក់ត្រូវភៀសខ្លួន៕