រដ្ឋាភិបាលចិន និង កូរ៉េខាងត្បូង បានអបអរសាទរដល់ជំនួបពិភាក្សាកំពូលជាលើកដំបូង រវាងប្រធានាធិបតី ពូទីន និង គីមជុងអ៊ុន នឹងបង្ហាញក្តីសង្ឃឹមថា ជំនួបនេះ នឹងជួយដល់ឧបទ្វីបកូរ៉េ ឲ្យទទួលបានសន្តិភាព។

មានប្រសាសន៍ ទៅកាន់ក្រុមអ្នកសារព័ត៌មាន នៅទីក្រុងប៉េកាំង អ្នកនាំពាក្យ ក្រសួងការបរទេសចិន បានបញ្ជាក់ថា រុស្ស៊ី និងកូរ៉េខាងជើង គឺជាប្រទេសជិតខាង និងជាមិត្តភាពរបស់ចិន ហើយទីក្រុងប៉េកាំង សប្បាយរីករាយយ៉ាងខ្លាំង នៅពេលទីក្រុងម៉ូស្កូ និងព្យុងយ៉ាង បង្កើននូវកិច្ចសហប្រតិបត្តិការទ្វេភាគី កាន់តែប្រសើរឡើង។ ទន្ទឹមនឹងនេះដែរ ទីក្រុងប៉េកាំង នឹងសហការជាមួយទីក្រុងមូស្គូ នាំមកនូវសន្តិភាពដល់ឧបទ្វីបកូរ៉េ។

អ្នកនាំពាក្យក្រសួងការបរទេសចិន បានបញ្ជាក់ទៀតថា «យើងជឿជាក់ទៅនឹងលទ្ធផល នៃជំនួបកំពូលខាងលើ នឹងក្លាយជាថាមពលថ្មី ជាកម្លាំងជំរុញថ្មី សម្រាប់ដោះស្រាយវិវាទ នៅលើឧបទ្វីបកូរ៉េ»។

ក្នុងថ្ងៃជាមួយគ្នានេះដែរ ប្រធានាធិបតីកូរ៉េខាងត្បូង លោក ម៉ូន ជេអ៊ីន ក៏បានបង្ហាញពីក្តីសង្ឃឹមថា ជំនួបនោះ នឹងនាំមកនូវសន្តិភាពដល់តំបន់ទាំងមូល និងឧបទ្វីបកូរ៉េ ។ លោក ម៉ូន ជេអ៊ីន បានវាយតម្លៃខ្ពស់ដល់ការខិតខំប្រឹងប្រែងរបស់ប្រធានាធិបតីរុស្ស៊ី ដើម្បីស្វែងរកដំណោះស្រាយនយោបាយដល់បញ្ហាឧបទ្វីបកូរ៉េ ផងដែរ។

លោកប្រធានាធិបតីកូរ៉េខាងត្បូង សង្ឃឹមថា កិច្ចប្រជុំនេះនឹងរួមចំណែកខ្ពស់ នៅក្នុងការរំសាយអាវុធបរមាណូ នៅលើឧបទ្វីបកូរ៉េ និងជាមូលដ្ឋាន សម្រាប់កិច្ចពិភាក្សាជាមួយអាមេរិក ស្តីពីកម្មវិធីបរមាណូរបស់កូរ៉េខាងជើង ថែមទៀតផង៕