គ្មានជីវិតគូណាដែលជៀសផុតពីការទាស់ទែងពាក្យសម្តីគ្នានោះទេ ។ ដូចពាក្យចាស់ពោលថា « អណ្តាតនិងធ្មេញតែងប៉ះទង្គិចគ្នា » រីឯជីវិតប្តីប្រពន្ធក៏ដូចគ្នាដែរ ។ បើកាលណាអ្នកទាំងពីរមិនចេះយោគយល់អធ្យាស្រ័យឱ្យគ្នាទេនោះ អ្នកទាំងពីរមុខជាអាចដើរដល់ផ្លូវបែកបាក់ជាមិនខាន ។

យ៉ាងណាមិញ ការឈ្លោះទាស់ទែងគ្នារវាងប្តីប្រពន្ធគឺជារឿងធម្មតា ដូច្នេះអ្នកទាំងពីរមិនគួរ៖

១. បង្ហោះ Status ក្នុងបណ្តាញសង្គម

ឈ្លោះគ្នាជារឿងមនុស្សពីរនាក់ ហេតុអីត្រូវបង្ហាញឱ្យសង្គមដឹងលឺរឿងអាស្រូវគ្រួសារខ្លួនបែបនេះ?

២. ប្រាប់ជនទី៣ឱ្យដឹងពីបញ្ហាជម្លោះ

ការដែលអ្នកជីកកាយរឿងផ្ទាល់ខ្លួនទៅប្រាប់គេឯងបែបនេះ មិនមែនជាដំណោះស្រាយល្អនោះទេ ។ ផ្ទុយទៅវិញ វាអាចក្លាយជាបញ្ហាចោទរបស់អ្នកទាំងពីរនៅថ្ងៃណាមួយក៏ថាបាន (ឧទាហរណ៍៖ បើមនុស្សដែលអ្នកប្រាប់នោះ មានបំណងចង់បំបែកបំបាក់អ្នកទាំងពីរស្រាប់ នោះវានឹងក្លាយទៅជាចំណុចខ្សោយរបស់អ្នកទាំងពីរមិនខាន)។

៣. ប្រើសម្តីគំរោះគំរើយដាក់គ្នា

គូស្នេហ៍ភាគច្រើនចូលចិត្តប្រើពាក្យសម្តីអាក្រក់ៗដាក់គ្នានៅពេលដែលមានកំហឹង ។ តែអ្នកមានដឹងទេថា ការដែលធ្វើបែបនេះ វាជះផលអាក្រក់ដល់ទំនាក់ទំនងអ្នកទាំងពីរកម្រិតណា! អ្នកទាំងពីរគួរតែស្ងប់ចិត្តរៀងខ្លួន និងដោះស្រាយវិវាទតាមសម្រួល ជៀសវាងការបញ្ចេញកំហឹងដាក់គ្នា ។

៤. មិននិយាយរកគ្នា

ពិតហើយ ថាពេលឈ្លោះគ្នា គ្មានអ្នកចង់និយាយរកគ្នានោះទេ ។ ក៏ប៉ុន្តែទម្លាប់អាក្រក់មួយនេះ បើចេះតែបន្តយូរៗទៅ វាអាចធ្វើឱ្យទំនាក់ទំនងអ្នកទាំងពីរកាន់តែឃ្លាតឆ្ងាយទៅៗ មិនយូរប៉ុន្មានក៏អស់ចិត្តស្រឡាញ់រៀងខ្លួន ។

៥. រំលឹកកំហុសឆ្គង

វាគ្មានបានប្រយោជន៍អីនោះទេ នៅពេលដែលអ្នកទាំងពីរនាំគ្នាមកជីកកកាយរឿងចាស់ៗដែលកន្លងហួសនោះ ។ វាប្រៀបបីដូចជាអ្នកកំពុងតែយកឈើមកឆ្កឹះដំបៅចាស់អញ្ជឹង ហើយធ្វើឱ្យអ្នកទាំងពីរឈឺរៀងខ្លួនទៅវិញ ។

៦. ទម្លាក់កំហុសឱ្យគ្នា

ការស្រឡាញ់មិនគួរមានចាញ់ឈ្នះនោះទេ ។ បើទោះខាងណាជាអ្នកត្រូវក៏ដោយ អ្នកត្រូវចេះយោគយល់អធ្យាស្រ័យឱ្យគ្នា នោះទើបបញ្ហាឆាប់បានបញ្ចប់​ ។ ឱ្យតែអ្នកព្រមថយមួយជំហាន នោះពិភពរបស់ទាំងពីរ នឹងមានសន្តិភាពមិនខាន ហើយទំនាក់ទំនងអ្នកទាំងពីរក៏កាន់តែល្អថែមទៀតផង ។

សូមចាំថា ប្តីប្រពន្ធគ្មានអ្វីដែលថាដោះស្រាយមិនបាននោះទេ ។ ដូច្នេះអ្នកគួរចេះរកដំណោះស្រាយដែលប្រសើរជាងទង្វើខាងលើនេះ ៕

អត្ថបទ៖ My Mood